दिघंचीत बेशिस्त पार्किंगमुळे वाहतूक कोंडी

दिघंची : दिघंची (ता. आटपाडी) येथे बेशिस्त पार्किंगमुळे वाहतूक कोंडी होत आहे. सर्वसामान्य नागरिक व वाहनचालक या त्रासाला चांगलेच कंटाळले आहेत. सध्या दिघंचीत मल्हारपेठ-पंढरपूर व दिघंची हेरवाड या राज्य मार्गाचे काम सुरू आहे. काम सुरू असल्याने रस्त्यावर धुळीचे साम्राज्य होत आहे.

एकीकडे धुळीचा त्रास सहन करावा लागत आहे तर दुसरीकडे बेशिस्त पार्किंगमुळे वाहतूक कोंडी होत आहे. बसस्थानक परिसरात गटारीचेही काम अपूर्ण आहे. त्याचबरोबर दुचाकी रोडवर उभ्या केल्याने वाहतूक कोंडी होत आहे.

दिघंची बसस्थानकापासून माणगंगा नदीवरील पुलापर्यंत, आटपाडी रोड- पडळे मॉल ते पेट्रोल पंप परिसर या ठिकाणापर्यंत वाहतूक कोंडी मोठ्या प्रमाणात होत आहे. बसस्थानक परिसरात फळविक्रेते रस्त्यावरच ठाण मांडून असल्याने या ठिकाणी बेशिस्त पार्किंग होत आहे.

दिघंची आटपाडी तालुक्यातील सर्वात मोठी बाजारपेठ आहे. शिवाय सातारा व सोलापूर जिल्ह्यातील नागरिकही बाजारसाठी दिघंचीत येत असतात. रविवारी दिघंचीचा बाजार असल्याने मोठ्या प्रमाणात शहीद भगतसिंग चौक दिघंची हायस्कूल परिसर ते बसस्थानक परिसरात वाहतूक कोंडी होत असते. या ठिकाणची बेशिस्त पार्किंग हटवून वाहतूक सुरळीत करावी अशी मागणी नागरिकांमधून होत आहे

फोटो-३१दिघंची३

फोटो ओळी:- दिघंची (ता. आटपाडी) येथे रविवारी बसस्थानक परिसरात मोठ्या प्रमाणात वाहतूक कोंडी झाली होती.