आटपाडीसह तालुक्यात संपूर्ण शांतता

आटपाडी : आटपाडीसह तालुक्यातील सर्व गावांत शनिवारी लॉकडाऊनला नागरिकांनी १०० टक्के प्रतिसाद दिला. शुक्रवारी एका दिवसात नवे ६३ कोरोना रुग्ण वाढल्याने तालुक्यात चिंतेचे वातावरण आहे. याचा परिणाम म्हणून शनिवारी दिवसभर औषध दुकाने वगळता सर्व दुकाने बंद ठेवण्यात आली.

आटपाडी तालुक्यातील कोरोना रुग्णांची संख्या दिवसेंदिवस वाढत चालली आहे. त्यामुळे जिल्ह्यात एकूण चाचणी केलेल्या रुग्णांच्या संख्येपैकी तब्बल २९ टक्के रुग्ण पॉझिटिव्ह आढळून आले आहेत. हे जिल्ह्यातील सर्वाधिक प्रमाण आहे. त्यामुळे तालुक्यातील नागरिक सध्या स्वतःहून काळजी घेताना दिसत आहेत. ग्रामपंचायत किंवा पोलिसांपैकी कुणीही ध्वनिक्षेपकावरून आवाहन न करता सर्व व्यापाऱ्यांनी दुकाने बंद ठेवून घरात राहणे पसंत केले.

एरव्ही, अत्यंत गजबजलेल्या तहसील कार्यालय चौकात शनिवारी दिवसभर शुकशुकाट होता. अशीच परिस्थिती सर्व प्रमुख चौक आणि नेहमी वर्दळ असणाऱ्या ठिकाणी होती. अधूनमधून तुरळक वाहनांची ये-जा सुरू होती. सर्वत्र शांतता पसरली असल्याने रुग्ण नेणाऱ्या रुग्णवाहिकेच्या सायरनच्या आवाजाने आटपाडीतील शांतता भंग पावत होती.