लोकांना हसविणाऱ्या तमाशा कलावंतांवर रडण्याची वेळ

सावर्डे (ता. तासगाव) येथे तमाशा फडांचे मालक व कलावंतांची बैठक झाली. यावेळी भास्कर सदाकळे, अमर नागजकर, सुमनताई खरसुंडीकर, लता लंका पाचेगावकर, रेणुकाताई खरसुंडीकर आदी उपस्थित होते.

लोकमत न्यूज नेटवर्क

सांगली : दोन वर्षांपासून कोरोनामुळे तमाशातील हंगामी कलावंतांची उपासमार सुरू आहे. त्यांना शासनाने मदत करण्याची मागणी कलाकारांनी केली. सावर्डे (ता. तासगाव) येथे तमाशा फडमालक व कलाकारांची बैठक पार पडली.

१५० वर्षांपूर्वी महाराष्ट्रात सर्वप्रथम तमाशा फड सुरू करणारे उमा बाबाजी यांच्या नावाने 'उमा बाबाजी हंगामी तमाशा कलाकार संघटना महाराष्ट्र' या नावाने संघटनेची स्थापना करण्यात आली. संस्थापक-अध्यक्ष म्हणून भास्कर सदाकळे यांची निवड झाली. कलावंतांच्या विविध मागण्यांच्या पूर्ततेसाठी तहसीलदार व जिल्हाधिकारी कार्यालयांसमोर आंदोलनाचा निर्णय झाला. त्याची सुरुवात तासगाव तहसील कचेरीसमोर धरणे आंदोलनाने केली जाणार आहे.

सदाकळे म्हणाले की, लोकसंस्कृती जपणाऱ्या, जनतेला हसविणाऱ्या तमाशा कलावंतांवर उपासमारीने रडण्याची वेळ आली आहे. या संकटकाळात शासनाने आणि समाजानेही मदत करायला हवी.

बैठकीला फडमालक अमर नागजकर, सुमनताई खरसुंडीकर, लता लंका पाचेगावकर, रेणुकाताई खरसुंडीकर यांच्यासह सांगली, कोल्हापूर जिल्ह्यातील तमाशा कलावंत उपस्थित होते.

संघटनेच्या सांगली जिल्हाध्यक्षपदी मंगेश सकट, महिला आघाडी जिल्हाध्यक्षपदी सुमनताई खरसुंडीकर, तासगाव तालुकाध्यक्षपदी सलीम मुजावर, महिला आघाडी अध्यक्षपदी लंका कांबळे यांच्या निवडी केल्या. सल्लागार म्हणून डॉ. संपत पार्लेकर, मेजर हनुमंत सदाकळे, भगवान लोंढे यांच्या निवडी केल्या.

चौकट

संघटनेच्या मागण्या अशा...

शासनाने तमाशा कलावंतांना त्वरित आर्थिक मदत करावी, कलावंतांचा समावेश दारिद्र्य रेषेखालील गटात करावा, घरकुले मंजूर करावीत, वैद्यकीय उपचारांसाठी मदत करावी, वृध्द कलाकारांना निवृत्तीवेतन सुरू करावे, फड मालकांना अनुदान दयावे.