जयंत कबड्डी प्रीमियर लीगच्या थराराला आजपासून सुरुवात

इस्लामपूर : येथील जयंत स्पोर्टस्‌च्यावतीने कबड्डी खेळाला प्रोत्साहन देण्यासाठी आयोजित करण्यात आलेल्या जयंत कबड्डी प्रीमियर लीगचे उद्घाटन सोमवारी सायंकाळी ६ वाजता जलसंपदा मंत्री जयंत पाटील यांच्याहस्ते होणार असल्याची माहिती स्पर्धेचे संयोजक नगरसेवक खंडेराव जाधव यांनी दिली. या स्पर्धेची तयारी पूर्ण झाली असून विजेत्या संघास २५ हजार रुपयांचे रोख पारितोषिक दिले जाणार आहे. सहभागी खेळाडूंची तहसील कार्यालय ते क्रीडानगरीपर्यंत मिरवणूक काढली जाणार आहे.

जाधव म्हणाले, येथील निनाईनगर परिसरातील जयंत स्पोर्टस् मैदानावर पाच दिवस या स्पर्धा होणार आहेत. स्पर्धेसाठी प्रत्येक संघाची ५० हजार रुपये बोली ठरवून लिलावाद्वारे ८ संघ निवडण्यात आले आहेत. यामध्ये देवराज पाटील यांचा राजारामबापू ईगल्स, कामेरीच्या रणजित पाटील यांचा जगदीशआप्पा रायडर्स, आदितीचे पृथ्वीराज पाटील यांचा आदिती पॅँथर, माजी नगरसेवक शिवाजी पवार यांचा यशोधन चॅलेंजर्स, वाळव्याच्या रवींद्र पाटील यांचा राजेंद्र पाटील भाऊ फायटर्स, अतुल लाहीगडे यांचा एसएल हरिकन्स, लिंबाजी पाटील, ब्रह्मनंद पाटील यांचा नरसिंह टायगर्स आणि जुनेखेडच्या सागर पाटील, नितीन कोळगे यांचा स्फूर्ती रॉयल असे आठ संघ सहभागी झाले आहेत.

दोन गटांत साखळी पद्धतीने या स्पर्धा होतील. १९ फेब्रुवारी रोजी रात्री नगरविकास राज्यमंत्री प्राजक्त तनपुरे यांच्याहस्ते बक्षीस वितरण केले जाईल. स्पर्धेतील द्वितीय क्रमांकासाठी १५ हजार रुपये रोख, तृतीय व चतुर्थ क्रमांकासाठी प्रत्येकी ७ हजार रुपयांचे बक्षीस दिले जाणार आहे. सर्वोत्कृष्ट खेळाडू, उत्कृष्ट चढाई, उत्कृष्ट क्षेत्ररक्षण यासह प्रत्येक दिवसाच्या खेळाचा मानकरी निवडला जाणार आहे. क्रीडा रसिकांसाठी गॅलरीची बैठक व्यवस्था करण्यात आली आहे, तर महिलांसाठी स्वतंत्र बैठक व्यवस्था करण्यात आली आहे.

यावेळी राष्ट्रवादीचे प्रदेश सरचिटणीस अरुण कांबळे, आयुब हवलदार, क्रांतिप्रसाद पाटील, सदानंद पाटील, सागर जाधव, हमीद लांडगे, विजय देसाई, उमेश रासनकर, राजवर्धन लाड, अतुल लाहीगडे, विजय महाडिक उपस्थित होते.