गवंड्याच्या खूनप्रकरणी तिघांना दहा दिवसांची कोठडी

इस्लामपूर : इस्लामपूर-कापूसखेड रस्त्यावरील ओसवाल प्लॉट परिसरात गवंड्याचा खून करणाऱ्या तिघांना येथील न्यायालयाने २० मार्चपर्यंत तब्बल दहा दिवस पोलीस कोठडीत ठेवण्याचे आदेश दिले. खून करणारे संशयित लूटमार आणि दुुखापतीचे गुन्हे करणारे पोलीस रेकॉर्डवरील सराईत गुन्हेगार आहेत. गवंड्याच्या खिशातील पैसे लुटण्यासाठी त्याला निर्जनस्थळी नेऊन त्याचा खून केल्याचे समोेर आले आहे.

संदीप शिवाजी कुटे, अनिल गणेश राठोड (दोघे रा. लोणार गल्ली, इस्लामपूर) व ऋतिक दिनकर महापुरे (रा. खांबे मळा, इस्लामपूूर) अशी अटकेत असलेल्या तिघा संशयियतांची नावे आहेत. हे सर्वजण झोपडपट्टी दादा विरोधी कायद्याखाली स्थानबद्ध असलेल्या रवी खोत याच्या टोळीतील साथीदार आहेत. राजेश सुभाष काळे (रा. नेहरूनगर, इस्लामपूर) असे मृताचे नाव आहे.

रविवारी मध्यरात्रीनंतर या तिघांनी राजेश काळे याचा लोखंडी रॉड आणि दगड डोक्यात घालून खून केला. त्याच्या खिशातील पैसे आणि मोबाइल काढून घेत तिघांनी तेथून पोबारा केला. निर्जनस्थळी घटना घडल्याने प्रत्यक्ष पुरावा अथवा प्रत्यक्षदर्शी साक्षीदार नसल्याने पोलिसांनी सीसीटीव्ही कॅमेऱ्याचा आधार घेत तपास सुरू ठेवला होता. बुधवारी सायंकाळी अटकेची कारवाई करेपर्यंत हे तिघे हल्लेखोर शहरामध्ये फिरत होते. खुनाच्या दुुसऱ्या दिवशी हे तिघेही जेथून काळे याला उचलला त्याच मद्यालयात दारू पिण्यासाठी गेल्याची चर्चा होती. या दरम्यान तांत्रिक बाबींचा आधार घेत इस्लामपूर गुन्हे प्रकटीकरण शाखेच्या पथकाने या तिघांच्या मुसक्या आवळल्या. पोलीस निरीक्षक नारायण देशमुख अधिक तपास करीत आहेत.