अजय कांबळे टोळीविरूद्ध हजार पानाचे दोषारोपपत्र

लोकमत न्यूज नेटवर्क

सांगली : पोलीस रेकॉर्डवरील सराईत गुन्हेगार अजय बापू कांबळे (वय २३, राजीव गांधीनगर झोपडपट्टी, जुना बुधगाव रस्ता, सांगली) याच्या टोळीवर महाराष्ट्र संघटित गुन्हेगारी अधिनियमानुसार (मोका) कारवाई करण्यात आली होती. या टोळीविरोधात हजार पानांचे दोषारोपपत्र मंगळवारी मोका न्यायालयात दाखल करण्यात आले.

कांबळेसह सोहेल सलीम अंकलगी (१९, वाल्मिकी आवास), अरबाज महंमद हनिफ माजगावकर (१९, वाल्मिकी आवास), रमजान आयुब शेख (१९, दत्तनगर) यांचा त्यात समावेश आहे. टोळीविरोधात खुनी हल्ला, जबरी चोरी, दरोड्यासह गंभीर गुन्हे दाखल आहेत, अशी माहिती पोलीस उपअधीक्षक अजित टिके यांनी दिली.

अजय कांबळे सराईत गुन्हेगार असून त्याने दहशतीसाठी टोळी तयार केली होती. २०१५ पासून टोळीने सांगलीसह परिसरात गुन्हे केले आहेत. स्वतःचे वर्चस्व टिकवण्यासाठी आणि आर्थिक फायद्यासाठी टोळीने दहशत निर्माण केली. खुनी हल्ल्यासह जबरी चोरी, दरोडा, चोरी, घरफोडी असे गंभीर गुन्हे टोळीवर दाखल आहेत. टोळीने तीन महिन्यांपूर्वी घरफोडी, जबरी चोरीसह तब्बल २७ गुन्हे दाखल असलेल्या रेकॉर्डवरील गुन्हेगार राकेश पंडित पुजारी (वय २३, वाल्मिकी आवास घरकूल) याच्यावर तलवारीसह धारदार शस्त्राने खुनी हल्ला केला होता. चोरीच्या सोन्याची वाटणी आणि पूर्ववैमनस्यातून हा हल्ला करण्यात आला. त्यानंतर कांबळे पसार होता. त्याला स्थानिक गुन्हे अन्वेषणच्या पथकाने अटक केली. टोळीची वाढती गुन्हेगारी मोडीत काढण्यासाठी पोलीस अधीक्षक दीक्षित गेडाम यांनी मोकाअंतर्गत प्रस्ताव तयार करण्याचे आदेश दिले होते. त्यानुसार शहर पोलीस ठाण्याचे निरीक्षक अजय सिंदकर यांनी प्रस्ताव सादर केला. कोल्हापूर परिक्षेत्राच्या विशेष पोलीस महानिरीक्षकांनी तातडीने मंजुरी दिली. दरम्यान, या गुन्ह्याचा तपास उपअधीक्षक टिके यांना केला. तपास पूर्ण करून न्यायालयात मंगळवारी दोषारोपपत्र दाखल केले.