बागेवाडीत डेंग्यूचे दहा रुग्ण

जत : बागेवाडी (ता. जत) येथे डेंग्यू साथीने थैमान घातले असून डेंग्यूमुळे सोपान बापू वाघमारे (वय ८२) यांचा तीन दिवसांपूर्वी मृत्यू झाला, तर आणखी दहाजणांना डेंग्यूची लागण झाली आहे. त्यापैकी सारिका वाघमारे (३२) यांची प्रकृती गंभीर आहे. त्यांच्यावर जत येथील खासगी रुग्णालयात उपचार सुरू आहेत. ग्रामपंचायत, आरोग्य यंत्रणा व प्रशासन मात्र सुस्त असल्याचे दिसून येत आहे.

बागेवाडी येथे मागील दहा दिवसांपासून डेंग्यूची साथ सुरू आहे. डेंग्यूमुळे सोपान बापू वाघमारे या ज्येष्ठ नागरिकाचा मृत्यू झाला आहे, तर गावातील सारिका वाघमारे, अभिजित तुपसौंदर्य (३०), अभिषेक तुपसौंदर्य (३२), स्वाती वाघमारे (२५), शांता वाघमारे (५०) यांच्यासह आणखी नऊजणांना डेंग्यूची लागण झाली आहे. त्यापैकी सारिका वाघमारे यांची प्रकृती चिंताजनक आहे. पुढील उपचारासाठी त्यांना जत येथील खासगी रुग्णालयात दाखल करण्यात आले आहे.

गावात डेंग्यूची साथ सुरू असताना बागेवाडी ग्रामपंचायत सरपंच, उपसरपंच व सदस्य आणि ग्रामसेवक मात्र बघ्याची भूमिका घेत आहेत. धूर फवारणी करण्यात आली नाही, यंत्र बंद पडले आहे, असे ग्रामसेवक बालम मुजावर सांगत आहेत. डेंग्यूवर शासकीय रुग्णालयातून मिळणारे औषधोपचार प्रभावी ठरले आहेत. परंतु कोरोना संसर्गामुळे डेंग्यू रुग्णावर उपचार होत नाहीत. त्यामुळे नाईलाजाने त्यांना खासगी रुग्णालयात उपचारासाठी जावे लागत आहे. गावात साथीचा प्रादुर्भाव दिवसेंदिवस वाढत असून आणखी काहीजणांना थंडी आणि तापाची लक्षणे दिसत आहेत. आरोग्य विभाग व प्रशासनाने तातडीने लक्ष घालून घरोघरी फिरून आरोग्य विभागाच्यावतीने सर्वेक्षण सुरू करावे, अशी मागणी पंचायत समिती सदस्या अर्चना पाटील व सामाजिक कार्यकर्ते नाथा पाटील यांनी केली आहे.