आरग, लिंगनूर, शिंदेवाडी, लक्ष्मीवाडी गावांना टँकर

लोकमत न्यूज नेटवर्क

लिंगनूर : आरग (ता. मिरज) येथे जिल्हा परिषद सदस्या सरिता कोरबू यांच्या स्वीय निधीमधून पिण्याच्या पाण्याचे टँकर उपलब्ध करण्यात आले. आमदार सुरेश खाडे यांच्याहस्ते त्यांचे लोकार्पण झाले.

आरग, लक्ष्मीवाडी, शिंदेवाडी व लिंगनूर या गावांना टँकर देण्यात आले. यावेळी आरगच्या सरपंच सुरेखा नाईक, ग्रामपंचायत सदस्य सर्जेराव खटावे, डाॅ. विवेक जाधव, वसंत कोरबू, गणेश जतकर, सुधीर कवाळे, पिंटू गायकवाड, माजी उपसरपंच डॉ. अनिल कोरबू उपस्थित होते. लक्ष्मीवाडीतून उपसरपंच सचिन तळंदगे, माजी सरपंच वसंत खोत, मधुकर पवार यांनी टँकर स्वीकारले. शिंदेवाडीच्या सरपंच सुतार, संदीप पाटील, पोपट माने व ग्रामपंचायत सदस्यांकडे खाडे यांनी टँकर सुपुर्द केला. लिंगनूरसाठी सरपंच मारूती पाटील, उपसरपंच चंद्रकांत नाईक, ग्रामसेवक बी. एल. पाटील, एन. बी. कोरे यांनी टँकर स्वीकारला.

सध्या उन्हाळ्यामुळे शिंदेवाडी, लक्ष्मीवाडी गावांत पाण्यासाठी वणवण करावी लागत आहे. सरिता कोरबू यांनी टँकर उपलब्ध केल्याने पाणीप्रश्न सुटण्यास मदत होईल, असे सरपंच मारुती पाटील म्हणाले. या गावांत ग्रामपंचायतीतर्फे तसेच काही सदस्यांतर्फे टँकरने पाणी पुरवठा सुरू आहे; मात्र ते अपुरे पडत असल्याने स्वीय निधीतून टँकर घेतल्याचे सरिता कोरबू म्हणाल्या.