ऑनलाईन, ऑफलाईन वर्गांना वर्षभर अनुपस्थित विद्यार्थ्यांना पुढील वर्गात प्रवेश नाही

सांगली : लॉकडाऊन काळात ऑनलाईन किंवा ऑफलाईन वर्गांना गैरहजर असणाऱ्या विद्यार्थ्यांना पुढील वर्गात प्रवेश न देण्याचा निर्णय खासगी इंग्रजी शाळांनी घेतला आहे. इंडिपेंडंट इंग्लिश स्कूल्स असोसिएशन (इसा) या संघटनेच्या राज्यभरातील ४ हजार २०० खासगी इंग्रजी शाळांनी हा निर्णय घेतला आहे. वर्गांना अनुपस्थित राहिल्याने विद्यार्थ्यांचे शैक्षणिक नुकसान होऊ नये, या हेतूने निर्णय घेतल्याची माहिती संघटनेचे अध्यक्ष राजेंद्र दायमा यांनी दिली.

संघटनेने प्रसिद्धी पत्रकात म्हटले आहे की, कोरोनामुळे राज्यातील शाळा गेल्या वर्षी १५ मार्चपासून बंद राहिल्या होत्या. जून-जुलैपासून ऑनलाईन शिक्षण सुरु झाले. त्यानंतर नोव्हेंबर - डिसेंबरपासून मर्यादीत विद्यार्थ्यांसह प्रत्यक्ष वर्ग सुरु झाले. राज्यभरात सुमारे १५ ते २० टक्के विद्यार्थी ऑनलाईन किंवा ऑफलाईन या दोन्ही माध्यमात शाळेच्या संपर्कात राहिले नाहीत. शिक्षणाच्या प्रवाहापासून दूरच राहिले. यातील अनेकांनी कोरोनामुळे स्थलांतर केले. स्थलांतराच्या प्रक्रियेत जुन्या शाळेपासून दुरावले, तसेच नव्या शाळेतही प्रवेश घेतला नाही.

अशा विद्यार्थ्यांना पुढील वर्गात प्रवेश देणे म्हणजे त्यांचे न भरुन येणारे शैक्षणिक नुकसान करण्यासारखे आहे. अभ्यासक्रम पूर्ण न केल्याने कोणत्याही ज्ञानाशिवाय ते पुढील वर्गात जातील, त्यामुळे विद्यार्थ्यांचे हित लक्षात घेऊन इसा संघटनेने या विद्यार्थ्यांना पुढील वर्गात प्रवेश न देण्याचा निर्णय घेतला आहे. राज्यभरातील ४ हजार २०० शाळा या निर्णयानुसार कार्यवाही करतील.

चौकट

अनेक पालकांनीही घेतला गॅप

गेल्या संपूर्ण वर्षभरात मुले फक्त ऑनलाईन शिक्षणावर अवलंबून राहिली. वर्ग प्रत्यक्ष सुरु झाले, तेव्हादेखील शंभर टक्के उपस्थिती लावता आली नाही. त्यामुळे अनेक पालकांनी आपल्या पाल्यासाठी यावर्षी गॅप घेण्याचा निर्णय घेतला आहे. अर्धवट ज्ञानासह वरच्या वर्गात जाण्यास त्यांचा विरोध आहे.