मोफत पाठ्यपुस्तकांची विद्यार्थ्यांना प्रतीक्षा

जत : शासनाने यंदाच्या शैक्षणिक सत्राला १८ जूनपासून ऑनलाइन पद्धतीने सुरुवात केली. तीन आठवडे उलटून गेले तरी जत तालुक्यातील विद्यार्थ्यांना अद्यापही मोफत पाठ्यपुस्तक योजनेतील पुस्तके उपलब्ध झाली नाहीत. एकीकडे अभ्यासक्रमाचा गोंधळ उडाला असून, विद्यार्थ्यांना अद्यापही मोफत पाठ्यपुस्तके मिळाली नसल्याने शिक्षण विभागात सावळा गोंधळ निर्माण झाला असल्याचे दिसून येत आहे.

शासनाच्या मोफत पाठ्यपुस्तक योजनेंतर्गत शासकीय शाळांतील पहिली ते आठवीपर्यंतच्या विद्यार्थ्यांना मोफत पाठ्यपुस्तकांचे वितरण केले जाते. साधारणत: शाळेचे सत्र सुरू होण्याच्या पहिल्याच दिवशी या पाठ्यपुस्तकांचे वितरण केले जाते. सांगली जिल्हा परिषद शिक्षण विभागाने विद्यार्थ्यांना मोफत पाठ्यपुस्तकांची मागणी नोंदविली आहे. जिल्ह्यात या योजनेंतर्गत पुस्तकांचे वितरण करण्यात येणार आहे. तथापि, शैक्षणिक सत्र सुरू होऊन तीन आठवडे उलटून गेले तरी जिल्ह्यात मोफत पाठ्यपुस्तकांचा पुरवठा झाला नसल्याचे शिक्षण विभागाकडून सांगण्यात आले.

यंदाच्या शैक्षणिक सत्राला १८ जूनपासून सुरुवात झाली असली तरी शाळांत शिक्षकांना ५० टक्के उपस्थिती ठेवण्याच्या आणि विद्यार्थ्यांना ऑनलाइन पद्धतीने धडे देण्याच्या सूचना आहेत. मात्र विद्यार्थ्यांकडे अद्याप पाठ्यपुस्तकेच नसल्याने शिक्षक अध्यापन करणार कसे आणि विद्यार्थी ऑनलाइन वर्गात अध्ययन करणार कसे, असा प्रश्न उपस्थित होत आहे. यासाठी पुस्तके प्राप्त झाल्यानंतर कोरोना संसर्गाची खबरदारी घेऊन त्यांचे वितरण करण्याचे नियोजन शिक्षण विभागाला करावे लागणार आहे.

चाैकट

कोरोनामुळे छपाई नाही

कोरोनाच्या साथीमुळे शासकीय मुद्रणालयातून छपाई झाली नसल्याने पुस्तके अद्याप उपलब्ध झाले नसल्याची चर्चा आहे. पुस्तकांची गरज ओळखून जत तालुक्यातील काही शाळांनी निकालपत्र देतानाच जुनी पुस्तके विद्यार्थ्यांकडून घेतते. ती नवीन वर्षाच्या विद्यार्थ्यांना देण्यात आल्याने ऑनलाइन वर्ग सुरू झाले आहेत. पाठ्यपुस्तक टंचाईची झळ अनेक शाळांना जाणवत आहे.