बदलत्या समीकरणांच्या बोरगावात तगडे इच्छुक

लोकमत न्यूज नेटवर्क

बोरगाव : राजकीयदृष्ट्या संवेदनशील बोरगाव (ता. वाळवा) येथील राजकीय समीकरणे कृष्णा कारखान्याच्या निवडणुकीत नेहमी बदलत राहतात. गावातील काँग्रेस विरुद्ध राष्ट्रवादीचा संघर्ष व्यक्तिसापेक्ष बदलतो, कारण येथील नेत्यांचा भूमिका नेहमीच वेगवेगळ्या असतात. यंदाही येथून तगडे इच्छुक पुढे आले आहेत.

गावात कृष्णा कारखान्यातील चार गट अस्तित्वात आहेत. सत्ताधारी भोसले गट, अविनाश मोहिते गट, इंद्रजित मोहिते गट व मदनराव मोहिते गट यात येथील सभासद व नेत्यांची विभागणी होते. अलीकडे मात्र मदनराव मोहिते गटाचे अस्तित्व दिसत नाही. या निवडणुकीत येथील इंद्रजित मोहिते गटही ‘बॅकफूट’वर गेला आहे. कारण या गटाचे हुकमी एक्का मानसिंग ऊर्फ बाळनाना पाटील आर्थिक घोटाळ्यात कारागृहात आहेत.

बोरगावचे मतदान ७३५, तर बोरगावखालील पाच वाड्यांचे मतदान ५०५ असे एकूण मतदान १,२४० आहे. त्यामुळे या गावचा उमेदवार रिंगणात असतोच. यावेळी भोसले यांच्या सहकार पॅनलकडून विद्यमान संचालक व जिल्हा परिषद सदस्य जितेंद्र पाटील इच्छुक आहेत. त्यांच्या कुटुंबात तीन पिढ्यांपासून ‘कृष्णा’चे संचालकपद आहे. अविनाश मोहितेंच्या संस्थापक पॅनलकडून राजारामबापू सूतगिरणीचे संचालक व ‘कृष्णे’चे माजी संचालक उदयसिंह शिंदे आणि बाजार समितीचे संचालक मानाजी पाटील, पोल्टी व्यावसायिक जगन्नाथ पाटील इच्छुक आहेत. इंद्रजित मोहितेंच्या रयत पॅनलकडून माजी उपसरपंच पैलवान विकास पाटील यांच्या नावाची चर्चा आहे. उमेदवारी कोणाला दिली जाणार व हा सामना दुरंगी होणार की तिरंगी, यावर या गावातील समीकरणे अवलंबून आहेत.