सांगलीत कडकडीत बंद, रस्ते ओस

फोटो : ०८शीतल०२ ते ०५

लोकमत न्यूज नेटवर्क

सांगली : शेतकरी संघटनांनी पुकारलेल्या ‘भारत बंद’ला मंगळवारी सांगली शहरातही उत्स्फूर्त प्रतिसाद मिळाला. सकाळी दहा वाजता उघडणारी दुकाने पूर्णपणे बंद होती. काही मोजक्याच दुकानदारांनी व्यवहार सुरू केले होते; पण नंतर तेही बंद करण्यात आले. मुख्य बाजारपेठेसह सर्वत्र शुकशुकाट दिसून आला.

केंद्र सरकारच्या कृषी कायद्याविरोधात शेतकरी संघटनांनी भारत बंदचे आवाहन केले होते. या बंदला शहरातील काँग्रेस, राष्ट्रवादी, शिवसेनेसह विविध सामाजिक संघटनांनीही पाठिंबा दिला होता. या बंदला शहरात उत्स्फूर्त प्रतिसाद मिळाला. बहुतांश व्यापाऱ्यांनीही दुकाने बंद ठेवली होती. कापडपेठ, मेन रोड, हरभट रोड, गणपती पेठ, मारुती रोड या परिसरातील व्यवहार बंद होते. त्यातूनही सकाळच्या टप्प्यात काही दुकानदारांनी दुकाने उघडली होती; पण शेतकरी संघटनेच्या कार्यकर्त्यांची रॅली येताच त्यांनीही दुकाने बंद केली. काही ठिकाणी मात्र दुकानदार व आंदोलकांत बाचाबाचीही झाली.

मुख्य बाजारपेठेसह मार्केट यार्ड, राममंदिर, वखार भाग परिसरातील व्यवहार बंद होते. शहरातील औषध दुकाने, दूध केंद्र वगळता इतरांनी बंदला पाठिंबा दिला होता. जनसेवा भाजी विक्रेता संघानेही बंदमध्ये सहभाग घेतला होता. त्यामुळे शहरातील मंगळवारचे सर्वच बाजार बंद करण्यात आले होते. शिवाजी मंडईत काही विक्रेते भाजीपाला विक्रीसाठी आले होते. पण थोड्या वेळाने त्यांनीही गाशा गुंडाळला. हाॅटेल व्यावसायिक, पानपट्टीचालकांनीही बंदमध्ये भाग घेत व्यवसाय बंद ठेवले होते. त्यामुळे शहरातील सर्वच रस्ते ओस पडले होते.

चौकट

कोल्हापूर मार्गावरील वाहतूक बंद

जिल्ह्यातील एसटीची वाहतूक सुरू होती. शहरातही सिटी बसेस फिरत होत्या; पण कोल्हापूर, इचलकरंजी, जयसिंगपूर या मार्गावरील वाहतूक सकाळी दहानंतर एसटी महामंडळाने थांबविली होती. लांबपल्ल्याच्या बसेसही सुरू होत्या.