शिवाजी मंडईला केले पत्र्यांनी बंदिस्त

लोकमत न्यूज नेटवर्क

सांगली : सांगली शहरात होलसेल भाजी बाजारात होणारी गर्दी टाळण्यासाठी छत्रपती शिवाजी मंडईत भरणारा होलसेल भाजीपाला बाजार सोमवारपासून कोल्हापूर रोडवरील फळ मार्केटला भरणार आहे. त्यामुळे येथील भाजी मंडईला पत्रे मारून बंदिस्त करण्यात आले. येथील दैनंदिन बाजार सरकारी घाटावर स्थलांतरित करण्यात आला.

रविवारी सकाळी महापालिकेच्या पथकाने मंडईच्या दोन्ही बाजूंचे प्रवेशद्वार पत्रे लावून सील केले. त्यानंतर येथे दररोज भरणारा बाजार सरकारी घाटाजवळील मंदिर परिसरात ठरावीक अंतराने वसविण्यात आला. सोमवारपासून येथील होलसेल बाजार कोल्हापूर रोडवरील विष्णुअण्णा फळ मार्केटमध्ये स्थलांतरित होणार आहे.

राज्य सरकारकडून संचारबंदीसह अनेक कडक निर्बंध लावले आहेत. या निर्बंधांची कडक अंमलबजावणी महापालिकेकडून केली जात आहे. सांगली, मिरज आणि कुपवाड शहरांत अत्यावश्यक आस्थापनावगळता आणि शासनाने परवानगी दिलेले व्यवसायवगळता अन्य आस्थापना आणि दुकाने बंद आहेत. मात्र, शहरात दररोज सकाळी छत्रपती शिवाजी महाराजांच्या पुतळ्यासमोर भरणाऱ्या होलसेल भाजीपाला मार्केटमुळे गर्दी होत होती. यामुळे कोरोनाचा संसर्ग बळावण्याची भीती निर्माण झाली होती.

ही गर्दी टाळण्यासाठी होलसेल भाजी बाजारच शहराबाहेर विष्णुअण्णा दुय्यम बाजार आवारात स्थलांतरित केला आहे.

सोमवारपासून जर छत्रपती शिवाजी महाराज पुतळा परिसरात कोणी भाजी होलसेलरने विक्री करण्याचा प्रयत्न केल्यास त्याच्यावर कायदेशीर कारवाई केली जाईल, असा इशाराही आयुक्त नितीन कापडणीस यांनी दिला आहे.

सरकारी घाटावर विक्रेत्यांना जागा ठरवून दिली आहे. त्यानुसार, त्यांनी मंडई वसविली आहे. मात्र, येथे विक्री करताना विक्रेत्यांनी नागरिकांची गर्दी होणार नाही, याची दक्षता घ्यावी व कोरोना नियमांचे पालन करावे, अशी सूचना आयुक्त नितीन कापडणीस यांनी दिली आहे.

चौकट

फलक झळकावला

शिवाजी मंडई सील केल्यानंतर याठिकाणी महापालिकेने फलक झळकावला. बाजार भरवल्यास कारवाई करण्याचा इशारा या फलकाद्वारे देण्यात आला आहे.