पट निश्चितीमध्ये शिराळा तालुका जिल्ह्यात अव्वल

पुनवत :

जिह्यातील प्राथमिक शाळांमध्ये पहिलीच्या वर्गात २०२१- २०२२ या शैक्षणिक वर्षासाठी गुढीपाडव्याच्या दिवशी पटनोंदणी करण्यात आली. यामध्ये शिराळा तालुक्याने जिल्ह्यात अव्वल स्थान पटकाविले आहे. जिल्ह्यात शिराळा तालुक्याची टक्केवारी ७७.१५ अशी सर्वाधिक आहे. शिक्षण विभागाने पालकांच्या ऑनलाइन बैठका घेऊन पटनोंदणीमध्ये हे यश मिळवले आहे.

पालकांच्या ऑनलाइन बैठकांना सभापती वैशाली माने, उपसभापती बाळासाहेब नायकवडी, पंचायत समिती सदस्या आश्विनीताई नाईक, मनीषा गुरव, गटविकास अधिकारी डॉ. अनिल बागल, गटशिक्षणाधिकारी प्रदीपकुमार कुडाळकर, विस्तार अधिकारी विष्णू दळवी, बाजीराव देशमुख, विषयतज्ञ मधुकर डवरी, पांडुरंग गायकवाड यांच्यासह पंचायत समितीचे सर्व सदस्य व सर्व केंद्रप्रमुखांनी उपस्थित मार्गदर्शन केले.

शिराळा तालुक्यात पहिलीच्या वर्गासाठी १५३२ दाखलपात्र विद्यार्थी आढळून आले त्यापैकी ११८२ विद्यार्थ्यांनी तालुक्यातील प्राथमिक शाळांमध्ये आपला प्रवेश निश्चित केला आहे. याची टक्केवारी ७७.१५ असून ही जिल्ह्यात अव्वल ठरली आहे. शिराळा तालुक्यात सर्वाधिक पटनोंदणी मांगले केंद्रात झाली आहे.

चौकट

नावीन्यपूर्ण उपक्रम

पट नोंदणीसाठी कोरोनाच्या पार्श्वभूमीवर तालुक्यात पालकांच्या ऑनलाइन बैठका घेण्याचा नावीन्यपूर्ण उपक्रम केवळ शिराळा तालुक्यात राबविण्यात आला. अधिकारी व पदाधिकाऱ्यांनी जागृती करल्याने हे यश मिळाले.