आटपाडीतील चहा विकणारा संतोष झाला सीए

लोकमत न्यूज नेटवर्क

आटपाडी : सलग बारावेळा अपयश येऊनही न डगमगता सीए उत्तीर्ण होणाऱ्या येथील चहा विक्रेत्याने आदर्श निर्माण केला आहे. त्याच्या जिद्दीला आटपाडी तालुका सलाम करत आहे. संतोष नामदेव बालटे हे त्याचे नाव.

आटपाडीला महावितरण कार्यालयासमोर संतोषचे वडील नामदेव बालटे यांचे चहाचे दुकान आहे. वडिलांना चहा विकत असताना मदत करत सीए होण्याचे स्वप्न बाळगणाऱ्या संतोषने सहा वर्षात बारावेळा सीएच्या परीक्षा दिल्या. बारा वेळा यशाने त्याला हुलकावणी दिली. अखेरच्या प्रयत्नात मात्र संतोषने यशाला गवसणी घालत सीए होण्याचे स्वप्न साकरलेच, शिवाय आईवडिलांच्या कष्टाचे पांग फेडले.

सध्या संतोषचे वडील नामदेव बालटे व भाऊ दीपक चहाचा व्यवसाय करत आहेत. मोठे भाऊ उत्तम बालटे सामाजिक कार्यात अग्रेसर आहेत. अत्यंत साधी राहणी व प्रामाणिकपणे व्यवसाय करणाऱ्या वडिलांनी कष्टाने मुलांना वाढवले आहे. कष्ट करण्याची तयारी हा संतोषचा अंगभूत गुण. शाळेत हुशार असणारा संतोष चहाचे कप धुताना आयुष्याची स्वप्ने बघत होता.