विट्याच्या उपनगराध्यक्षपदी सारिका सपकाळ यांची निवड

विटा नगरपरिषदेची निवडणूक येत्या काही महिन्यांवर येऊन ठेपली आहे. त्यामुळे या पदासाठी सत्ताधारी गटातील अनेकांनी फिल्डिंग लावली होती. इच्छुकांची संख्या जास्त असल्याने माजी आ. पाटील यांच्यासमोर पेच निर्माण झाला होता; परंतु गुरुवारी सायंकाळी माजी आ. अ‍ॅड. पाटील व माजी नगराध्यक्ष वैभव पाटील यांच्या उपस्थितीत सत्ताधारी गटाचे नगरसेवक व कार्यकर्त्यांची बैठक झाली. या बैठकीत उपनगराध्यक्ष पदासाठी सारिका सपकाळ यांचे नाव निश्चित करण्यात आले.

शुक्रवारी विटा नगरपरिषदेच्या लोकनेते हणमंतराव पाटील सभागृहात नगराध्यक्षा तथा पीठासन अधिकारी प्रतिभा पाटील यांच्या अध्यक्षतेखाली विशेष सभा झाली. यावेळी उपनगराध्यक्ष पदासाठी सारिका सपकाळ यांचा एकमेव अर्ज दाखल झाला होता. त्यामुळे त्यांची उपनगराध्यक्ष पदी निवड झाल्याचे जाहीर करण्यात आले.

यावेळी माजी नगराध्यक्ष वैभव पाटील, मावळते उपनगराध्यक्ष अ‍ॅड. अजित गायकवाड, नगरसेवक किरण तारळेकर, अ‍ॅड. विजय जाधव, दहावीर शितोळे, प्रतिभा चोथे, मनीषा शितोळे, नेहा डोंबे, सानिका दिवटे, मीनाक्षी पाटील, संजय तारळेकर, मुख्याधिकारी अतुल पाटील, संजय सपकाळ, अविनाश चोथे, अ‍ॅड. सचिन जाधव यांच्यासह नागरिक उपस्थित होते.

फोटो - १३०२२०२१-विटा-उपनगराध्यक्ष निवड : विटा नगरपरिषदेच्या उपनगराध्यक्षपदी सारिका सपकाळ यांची निवड झाल्यानंतर त्यांचा नगराध्यक्षा प्रतिभा पाटील यांच्या हस्ते सत्कार करण्यात आला.