सांगलीत संभाजी पवार गटाला खिंडार

लोकमत न्यूज नेटवर्क

सांगली : शहरातील माजी आमदार संभाजी पवार गटाला खिंडार पाडण्यात राष्ट्रवादी काँग्रेसला यश आले. पवार समर्थक माजी नगरसेवक बाळासाहेब गोंधळी, संतोष देवळेकर व हेमंत खंडागळे यांनी पालकमंत्री जयंत पाटील यांच्या उपस्थितीत राष्ट्रवादीत प्रवेश केला. पवार गटासोबतच खा. संजयकाका पाटील यांच्या गटालाही राष्ट्रवादीने दणका दिला आहे.

शहरात माजी आमदार संभाजी पवार यांचा स्वतंत्र गट कार्यरत आहे. सध्या पवार हे भाजपमध्ये असले, तरी त्यांच्या गटाचे अस्तित्व आजही कायम आहे. कधीकाळी पालकमंत्री जयंत पाटील व संभाजी पवार यांच्यातील राजकीय सलगीची चर्चा जिल्ह्यात होत होती. २००८ च्या महापालिका निवडणुकीत महाआघाडी स्थापन करत जयंत पाटील शहरातील राजकारणात प्रवेश केला होता. यावेळीही पवार हे त्यांच्यासोबत होते; पण सर्वोदय साखर कारखान्यावरून पाटील-पवार यांच्या बिनसले. त्यांच्यात टोकाचे मतभेद निर्माण झाले. त्यानंतरच्या विधानसभा व लोकसभा निवडणुकीत पवारांचे अनेक शिलेदार सोडून गेले.

आता राष्ट्रवादीने पुन्हा पवार गटाला खिंडार पाडले आहे. पवार समर्थक माजी नगरसेवक बाळू गोंधळी, संतोष देवळेकर यांच्या नगरसेविका पती हेमंत खंडागळे यांनी सोमवारी रात्री पालकमंत्री जयंत पाटील यांच्या उपस्थितीत राष्ट्रवादीत प्रवेश केला. गोंधळी हे दोनदा, तर देवळेकर हे एकदा नगरसेवक म्हणून निवडून आले होते. याशिवाय खासदार संजयकाका गटाचे अभिजित पवार, सुनील भोसलें, मुफीत कोळेकर, विलास बेले यांनीही राष्ट्रवादीत प्रवेश केला. सध्या राष्ट्रवादीची ताकद वाढत असून, प्रवेश केलेल्या प्रत्येकाला योग्य न्याय दिला जाईल, अशी ग्वाही पाटील यांनी यावेळी दिली. प्रारंभी शहर जिल्हाध्यक्ष संजय बजाज यांनी स्वागत केले. यावेळी कमलाकर पाटील, राहुल पवार, सुरेश पाटील, मैनुद्दीन बागवान, आयुब बारगीर, सागर घोडके, विनया पाठक, अनिता पांगम, वंदना चंदनशिवे, डॉ. छाया जाधव, संगीता हारगे, ज्योती आदाटे उपस्थित होते. युवक शहर जिल्हाध्यक्ष राहुल पवार यांनी आभार मानले.

फोटो ओळी :- संभाजी पवार समर्थक माजी नगरसेवकांनी पालकमंत्री जयंत पाटील यांच्या उपस्थितीत राष्ट्रवादीत प्रवेश केला. यावेळी संजय बजाज, कमलाकर पाटील, मैनुद्दीन बागवान, राहुल पवार उपस्थित होते.