सांगलीत शिवप्रतिष्ठान फुटीच्या उंबरठ्यावर

चौगुले समर्थकांनी दिलेल्या प्रसिद्धीपत्रकात म्हटले आहे की, श्री शिवप्रतिष्ठान हिंदुस्थानचे कार्यवाह नितीन चौगुले यांना कोणतेही कारण न देता तडकाफडकी निलंबित केल्यामुळे महाराष्ट्रातील हजारो हिंदुत्ववादी कार्यकर्त्यांच्या भावना दुखावल्या गेल्या आहेत. याबाबत चर्चा, विनिमय करून मार्ग काढण्यासाठी रविवारी (दि. २१) शिवभक्तांचा मेळावा आयोजित केला आहे. २१ फेब्रुवारी रोजी दुपारी चार वाजता माधवनगर रोडवरील डेक्कन मॅन्युफॅक्चरर्स असोसिएशनच्या सभागृहात नितीन चौगुले मित्रमंडळातर्फे हिंदुत्ववादी शिवभक्त एकत्र येणार आहेत.

गेली दोन दशके नि:स्वार्थी भावनेने भगव्या ध्वजाची सेवा करणारे नितीन चौगुले यांना शिवप्रतिष्ठानमधून विनाकारण तडकाफडकी काढून टाकण्याची बाब हिंदुत्ववादी कार्यकर्त्यांना जिव्हारी लागली आहे. गडकोट मोहीम, दुर्गामाता दौड, बलिदान मास, भक्ती-शक्ती संगम अशा अनेक विधायक उपक्रमांत नितीन चौगुले आघाडीवर आहेत. शिवप्रतिष्ठानच्या माध्यमातून त्यांनी राज्यभर हिंदुत्ववादी युवकांचे तगडे संघटन उभे केले आहे. भिडे गुरुजींच्या मार्गदर्शनाखाली गेली त्यांनी २० वर्षे नि:स्वार्थीपणे कार्य केले. असे असताना नितीन चौगुलेंसारखा कडवट हिंदुत्वाचा पुरस्कर्ता व शिवशंभू मार्गाने चालणाऱ्या व्यक्तीस संघटनेतून हटवणे हे सयुक्तिक वाटत नाही, असे मत चौगुले समर्थकांनी यात व्यक्त केले आहे.

शिवभक्तांच्या या मेळाव्याकडे आता सर्वांचे लक्ष लागले आहे. या माध्यमातून कारवाईस आव्हान दिले गेल्याने शिवप्रतिष्ठान संघटनेत फूट पडणार की काय, असा सवालही उपस्थित होत आहे. गेल्या काही दिवसांपासून चौगुले यांच्यावरील कारवाईमुळे सांगलीतील वातावरण तापले आहे.

चौकट

चौगुलेंच्या भूमिकेकडे लक्ष

शिवभक्तांच्या मेळाव्यात नितीन चौगुले अनेक गोष्टींचा खुलासा करणार आहेत. याच बैठकीत ते पुढील भूमिकाही मांडणार आहेत. त्यामुळे त्यांच्या भूमिकेकडे अनेकांचे लक्ष लागले आहे.

चौकट

नेमकं काय घडतंय संघटनेत

संघटनेचे राष्ट्रीय अध्यक्ष रावसाहेब देसाई यांनी काही दिवसांपूर्वी चौगुले यांना संघटनेतून काढल्याची माहिती दिली.

चौगुले यांच्याबद्दल दोन वर्षांपासून तक्रारी येत असल्याचे त्यांनी सांगितले.

अद्याप संघटनेकडून कारणांचा खुलासा केला नाही

दुसरीकडे चौगुले समर्थक शिवभक्तांनी संताप व्यक्त करीत वेगळी भूमिका घेण्याची तयारी केली आहे.

त्यांच्या भूमिकेवर संघटनेतील फुटीचे चित्र अवलंबून राहणार आहे.