जतमध्ये स्वीकृत सदस्यपदी आरपीआयचा दावा

जत : जत नगर परिषदेच्या स्वीकृत सदस्यपदी आर. पी. आय. उमेदवाराला यावेळी संधी द्यावी अन्यथा आगामी स्थानिक स्वराज्य संस्था, विधानसभा व लोकसभा निवडणुकीत आम्हाला वेगळा विचार करावा लागेल, असा इशारा रिपब्लिकन पार्टी ऑफ इंडिया आठवले गटाचे जिल्हाध्यक्ष संजयरावजी कांबळे यांनी दिला आहे.

ते म्हणाले, आम्ही प्रत्येक स्थानिक स्वराज्य संस्था, विधानसभा व लोकसभा निवडणुकीत भाजपच्या उमेदवाराचाच प्रामाणिकपणे प्रचार केला आहे. त्यामुळेच भाजपला याचा फायदा झाला आहे. जत नगर परिषदेच्या निवडणुकीत पक्षाने दोन जागा मागितल्या असताना, केवळ एक जागा देऊन आमची बोळवण केली होती. नगर परिषदेत भाजपकडून स्वीकृत नगरसेवकाची निवड करण्यात येणार आहे. भाजपचे स्वीकृत नगरसेवक, माजी उपनगराध्यक्ष उमेश सावंत यांनी राजीनामा दिला आहे. त्यामुळे त्यांच्या रिक्त झालेल्या पदावर भाजपने आर. पी. आय. आठवले गटाच्या उमेदवाराला संधी द्यावी, अशी मागणी केली आहे.