सांगली: शहरातील कोल्हापूर रोडवरील शास्त्री चौक येथे एका घराच्या छतावरील लोखंडी गेट चोरून नेत असताना गेट अंगावर पडून चोरट्याचा मृत्यू झाला. ही घटना बुधवार ०९ नोव्हेंबर रोजी दुपारी साडे तीनच्या सुमारास घडली. अजय राजू माळी (वय २७ रा. माडग्याळ ता. जत सध्या. सांगली) असे मृताचे नाव आहे. या घटनेची सांगली शहर पोलीस ठाण्यात नोंद झाली आहे. याप्रकरणी रेखा कुमार झेंडे (वय ५५) यांनी पोलिसात फिर्याद दिली आहे.
मृत अजय माळी हा मूळचा माडग्याळ येथील रहिवाशी आहे. त्याचे वडील बेपत्ता आणि आईचा मृत्यू झाल्याने तो सांगलीमध्ये काही महिन्यांपूर्वी आला होता. शहरात फिरस्ता म्हणून छोटीमोठी कामे करत होता. काही दिवसांपूर्वी कोल्हापूर रोडवरील शास्त्री चौक येथील रेखा झेंडे यांनी त्याला घरावर आलेले झाड तोडण्याचे काम सांगितले होते. यावेळी तो झाड तोडत असताना घरावर लोखंडी गेट पडलेले दिसले. त्यादिवशी तो साफसफाई करून निघून गेला.
बुधवारी तो लोखंडी गेट चोरून नेण्यासाठी टेरेसवर गेला. लोखंडी गेट घेऊन उतरत असताना तोल जाऊन तो पडला. त्याच्या अंगावर लोखंडी गेट पडले. यात त्याचा जागीच मृत्यू झाला. घटनेची माहिती मिळताच उपविभागीय पोलीस अधिकारी अजित टिके, शहर पोलीस ठाण्याचे निरीक्षक अभिजित देशमुख यांनी घटनास्थळी भेट देऊन पाहणी केली. मृतदेह शवविच्छेदनासाठी शासकीय रुग्णालयात पाठविण्यात आला. या घटनेची नोंद शहर पोलिसात झाली आहे.