दस्तनोंदणीतून जिल्ह्यात २१३ कोटींचा महसूल

सांगली : शासनाने मुद्रांक शुल्कात दिलेल्या सवलतीमुळे दस्त नोंदणी्ला जिल्ह्यात कोरोना काळातही मोठी चालना मिळाली. त्यामुळे यंदा यातून तब्बल २१३ कोटी रुपयांचा महसूल शासनाला मिळाला आहे. मागील वर्षाच्या तुलनेत व यंदाच्या उद्दिष्टाच्या तुलनेत हा महसूल अधिक आहे.

जिल्ह्यातील मुद्रांक शुल्क व नोंदणी फीच्या माध्यमातून यावेळी ११२ टक्के उद्दिष्टपूर्ती झाली आहे. २०२०-२१ या आर्थिक वर्षात एकूण ५३ हजार ४३२ दस्तांची नाेंदणी झाली. १९० कोटींचे उद्दिष्ट असताना, २१३ कोटी २ हजार ९४६ इतका महसूल मिळाला. शासनाने मुद्रांक शुल्क सवलत दिल्यानंतर बांधकाम क्षेत्राला चालना मिळाली. डिसेंबरपर्यंत ३ टक्के व मार्चअखेर २ टक्के शुल्क सवलतीचा लाभ घेण्यासाठी जिल्ह्यातून मोठा प्रतिसाद मिळाला.

विशेष म्हणजे कवठेमहांकाळ, आटपाडी या दुष्काळी भागातूनही मोठी दस्तनाेंदणी झाली. कडेगाव तालुक्यातून सर्वाधिक २१७ टक्के, कवठेमहांकाळमध्ये १०७ टक्के, आटपाडीतून १९६ टक्के उद्दिष्टपूर्ती झाली. सांगलीतील सहजिल्हा निबंधक कार्यालयात १६७ टक्के महसूल मिळाला. कोरोना काळातही शासनाच्या शुल्क सवलतीचे सकारात्मक परिणाम बांधकाम व्यवसायावर दिसून आले आहेत. त्यामुळेच शासनाच्या महसुलातही अधिक भर पडली आहे.

जिल्ह्यात २०१९-२० या आर्थिक वर्षात १८७ कोटी महसूल गृहीत धरला असताना १९८ कोटी म्हणजेच १०६ टक्के महसूल जमा झाला. संपलेल्या आर्थिक वर्षात त्यापेक्षा ६ टक्क्यांनी अधिकची भर पडली आहे. शुल्क सवलतीचा लाभ घेण्यासाठी मार्चमध्येही मोठी गर्दी सर्व कार्यालयांमध्ये झाली होती. मार्चमध्ये शासनाची सवलत संपुष्टात आली.

तालुकानिहाय स्थिती

कार्यालय दस्तनोंदणी महसूल टक्के

सांगली ९९५१ ५४,२१,९५,२०० ९६.८२

मिरज ६७५२ २३,३२,५९,४२० ८६.३९

कुपवाड ४१६९ २१,००,१२,९७० १७५.०१

वाळवा ४८७१ १३,६८,८५,२९६ १०५.२९

जत ४३९५ १०,६१,६६,९६१ ९८.७६

तासगाव ५०३४ १०,५८,३८,१८० ९८.४५

विटा-खानापूर ३६९७ १०,५३, ४९,३३० ९७.९९

आटपाडी २१२० १४,७५,८६,७५२ १९६.७८

आष्टा २९२१ ७,०१,७०,७४५ १०७.९५

शिराळा १३५४ ३,१०,४९,४२० ८६.२२

पलूस ३४५७ ६,६२,०३,२८५ ८२.७५

कडेगाव १९३९ ९,७९,७४,५०२ २१७.७२

क.महांकाळ २७७२ ८,०९,१३,००० १०७.८८

सांगली १९,६३,९७,८८५ १६७.१४

आष्टा २९२१