शिक्षक बँकेत सेवानिवृत्त लोकांना थारा नको

ओळी : अंकलखोप येथे शिक्षक संघाच्या वतीने आयोजित कार्यकर्ता शिबिरात जिल्हा बँकेचे अध्यक्ष दिलीप पाटील यांनी मार्गदर्शन केले. यावेळी जि. प. सदस्य नितीन नवले, अविनाश गुरव, पोपटराव सूर्यवंशी उपस्थित होते.

लोकमत न्यूज नेटवर्क

सांगली : प्राथमिक शिक्षक बँकेत सेवानिवृत्त लोकांना थारा नको. बँक ही सभासदांनी निवडून दिलेल्या प्रतिनिधींनी चालवावी, असे प्रतिपादन जिल्हा मध्यवर्ती बँकेचे अध्यक्ष दिलीपतात्या पाटील यांनी केले.

अंकलखोप येथे शिक्षक संघाच्या वतीने आयोजित कार्यकर्ता शिबिरात ते बोलत होते. यावेळी जि. प. सदस्य नितीन नवले उपस्थित होते. पाटील म्हणाले की, सध्या शिक्षक बँकेत सेवानिवृत्त नेत्यांची ढवळाढवळ जास्त आहे. त्यामुळे नेत्यांची मर्जी सांभाळताना सभासद हिताकडे दुर्लक्ष होत आहे. मी एका शिक्षकाचा मुलगा असल्याने शिक्षकांप्रती माझ्या मनात नेहमीच आदर असतो. माझे वडील स्व. लालासाहेब पाटील हे शिक्षक संघाचे जिल्हाध्यक्ष होते. त्यामुळे शिक्षक संघ या संघटनेशी जुने नाते आहे.

जिल्हाध्यक्ष विनायक शिंदे म्हणाले, शिक्षक बँकेतील भ्रष्ट कारभारास सभासद कंटाळला आहे. संगणक दुरुस्ती, नोकरांचे बोनस, पगार यावर लाखोंची उधळपट्टी सुरू आहे. आगामी निवडणुकीत सभासद सत्तांतर केल्याशिवाय राहणार नाहीत.

यावेळी सरचिटणीस अविनाश गुरव, पार्लमेंटरी बोर्डाचे अध्यक्ष पोपटराव सूर्यवंशी यांची भाषणे झाली. सुरुवातीला शिक्षक बँकेचे संस्थापक दाजी गुरुजी यांच्या प्रतिमेचे पूजन करण्यात आले. पार्लमेंटरी बोर्डाचे नेते अरुण पाटील यांनी प्रास्ताविक तर संजय पाटील यांनी आभार मानले. कार्यक्रमाला पार्लमेंटरी बोर्डाचे सर्व सदस्य, शिक्षक बँकेचे संचालक, जिल्हा कार्यकारिणी सदस्य, सर्व तालुकाध्यक्ष व तालुका कार्यकारिणी सदस्य उपस्थित होते.