गरिब विद्यार्थ्यांच्या शिष्यवृत्तीसाठी निवृत्तीला ठेव

लोकमत न्यूज नेटवर्क

सांगली : आपल्या आवडत्या राजकीय नेत्याला पद मिळावे, आमदारकी मिळावी म्हणून कार्यकर्ते उपासतापास करीत असल्याची अनेक उदाहरणे आहेत; नेत्यांच्या वाढदिवसाला पदरमोड करण्याची संख्याही कमी नाही. मात्र, ही पदरमोड किती सत्कारणी लागते, हा संशोधनाचा विषय आहे. अशातच मिरजेतील महापालिका शिक्षण मंडळाकडील मुख्य लिपिक श्रीकांत भोई यांनी मात्र समाजासमोर नवा आदर्श ठेवत नेत्याच्या वाढदिवसाला गोरगरीब, हुशार विद्यार्थ्यांना शिष्यवृत्ती देण्याचा संकल्प केला आहे.

श्रीकांत भोई हे मिरजेतील महापालिका शिक्षण मंडळाकडील मुख्य लिपिक, लेखापाल या पदावर कार्यरत आहेत. ते आज, शुक्रवारी (दि. ३०) सेवानिवृत्त होत आहेत. महापालिकेचे माजी महापौर किशोर जामदार यांना ते मानतात. जामदार यांचा गुरुवारी वाढदिवस होता. नेत्याच्या वाढदिवसाचे औचित्य साधत भोई यांनी आगळावेगळा संकल्प केला.

आपण सेवानिवृत्त होत असून, आपल्या भविष्य निर्वाह निधीतील एक लाख रुपयांची रक्कम बँकेत ठेव स्वरूपात ठेवावी. या रकमेतून किशोर जामदार यांच्या वाढदिवशी मिरज हायस्कूल व महापालिका शाळेतील गोरगरीब विद्यार्थ्यांना शिष्यवृत्ती देण्यात यावी. त्यासाठी ‘किशोर जामदार एज्युकेशन फंड शिष्यवृत्ती’ या नावाने हा उपक्रम सुरू करावा, असे पत्रच त्यांनी महापालिकेच्या प्रशासन अधिकारी हणमंत बिराजदार यांना दिले. त्यांच्या या संकल्पाचे मिरजेत कौतुक होत आहे. वास्तविक, आपला नेता आमदार व्हावा, खासदार, मंत्री व्हावा म्हणून अनेक कार्यकर्ते संकल्प करीत असतात; पण लिपिक असलेल्या भोई यांनी नेत्यांच्या वाढदिवसाच्या संकल्पातही सामाजिक जाणीव ठेवल्याचे दिसून येते. भोई यांच्या वाढदिवस भेटीने किशोर जामदारसुद्धा भारावून गेले होते.

चौकट

फंड वाढविण्याचा निर्धार

श्रीकांत भोई यांच्या संकल्पाची मिरजेत दिवसभर चर्चा सुरू होती. त्यात आता जामदार यांच्या समर्थक कार्यकर्त्यांनी हा फंड पाच लाखांपर्यंत नेण्याचा निर्धार केला आहे. या रकमेच्या व्याजातून गोरगरीब विद्यार्थ्यांना मदत केली जाणार आहे.