इस्लामपुरात शिवछत्रपतींना मानाचा मुजरा

इस्लामपूर : इस्लामपूर शहर आणि परिसरात हिंदवी स्वराज्याचे संस्थापक छत्रपती शिवाजी महाराज यांची जयंती मोठ्या उत्साहात साजरी करण्यात आली. जयंती उत्सवाच्या पार्श्वभूमीवर तहसील कार्यालयासमोरील छत्रपती शिवाजी महाराज आणि भारतरत्न डॉ. बाबासाहेब आंबेडकर यांचा पुतळा परिसर आकर्षक विद्युत रोषणाईने सजविण्यात आला होता. शिवाजी महाराजांच्या पुतळ्याजवळ भगव्या ध्वजाची फडफडणारी आरास लक्षवेधी ठरली होती.

उपनगराध्यक्ष दादासाहेब पाटील, राष्ट्रवादीचे शहराध्यक्ष शहाजी पाटील, विकास आघाडीचे गटनेते विक्रम पाटील, शिवसेनेचे नगरसेवक शकील सय्यद, डॉ. संग्राम पाटील, वैभव पवार, चेतन शिंदे, मुख्याधिकारी अरविंद माळी, सुभाष शिंगण यांच्यासह नगरसेविका सुप्रिया पाटील, सुनीता सपकाळ, मंगल शिंगण, संगीता कांबळे, उपमुख्य अधिकारी प्रमिला माने-पाटील यांनी महाराजांच्या पुतळ्यास पुष्पहार अर्पण करून अभिवादन केले.

दिवसभरात शहर आणि परिसरातील युवकांचे जथ्थे भगवे झेंडे आणि शिवज्योत घेऊन छत्रपती शिवाजी महाराज यांना अभिवादन करत होते. छत्रपती शिवाजी महाराज की जय अशा घोषणांनी हा परिसर दिवसभर गुंजत राहिला होता. शाहिरी पोवाड्यांनी वातावरण चैतन्यदायी बनले होते. शहराच्या विविध परिसरात बालचमुंनीही उत्साहात शिवजयंती साजरी केली.

फोटो- १९०२२०२१-आयएसएलएम-इस्लामपूर शिवजयंती न्यूज

इस्लामपूर येथे पालिकेच्यावतीने छत्रपती शिवाजी महाराज यांना अभिवादन करण्यात आले. यावेळी नगरसेवक व अधिकारी उपस्थित होते.