धनगावात वसुली द्या आणि सोन्याची अंगठी जिंका!

भिलवडी

: पलूस तालुक्यातील धनगाव ग्रामपंचायतीने ‘थकीत कर भरा आणि सोन्याची अंगठी जिंका,’ अशी अभिनव बक्षीस योजना सुरू केली आहे. याचा सकारात्मक परिणाम होऊन नागरिकांकडून कर भरण्यास प्रतिसाद मिळत आहे.

सरपंच सतपाल साळुंखे यांच्या अध्यक्षतेखाली झालेल्या बैठकीत हा निर्णय घेण्यात आला. यावेळी उपसरपंच कुसुम साळुंखे, ग्रामपंचायत सदस्य संदीप यादव, रमेश पाटील, हणमंत यादव, आशा केवळे, आरती साळुंखे, स्वाती यादव, काजल मदने, ग्रामसेवक प्रकाश माळी आदी उपस्थित होते. या आर्थिक वर्षासह पाठीमागील थकीत अशी सत्तावीस लाख रुपये घरपट्टी, पाणीपट्टी येणे बाकी आहे. मार्चअखेर वसूल करणे अपेक्षित आहे. यासाठी नावीन्यपूर्ण करवसुली व प्रोत्साहनपर बक्षीस योजना लागू करण्यात आली आहे. नियमित व थकीत वसुली जमा करणाऱ्या सर्व नागरिकांसाठी लकी ड्रॉ आयोजित करण्यात आला आहे. प्रथम, द्वितीय, तृतीय क्रमांकास अनुक्रमे सात, पाच व तीन ग्रॅम वजनाची सोन्याची अंगठी बक्षीस मिळणार आहे. चार ते आठ क्रमांक विजेत्यांना पैठणी साडी, नऊ ते पंधरा क्रमांक विजेत्यांना टेबल फॅन, सोळा ते पंचवीस क्रमांक विजेत्यांना मिक्सर अशी पंचवीस बक्षिसे आहेत. सत्तर टक्के रक्कम वसूल झाल्यास या योजनेंतर्गत लकी ड्रॉ काढण्यात येणार आहे.

कोट

गावातील सर्व नागरिकांनी ३१ मार्चअखेर घरपट्टी व पाणीपट्टी भरल्यास ग्रामपंचायतीची वसुली पूर्ण होईल. त्यामधून विविध विकासकामे पूर्ण करण्यास निधी उपलब्ध होईल.

-सतपाल साळुंखे, सरपंच