कामेरीत कोरोनाचा पुन्हा उद्रेक

कामेरी : कामेरी प्राथमिक आरोग्य केंद्रात सोमवारी कामेरी येथील १३, तर गाताडवाडी येथील १ असे १४ नवे कोरोनाबाधित सापडले. दिवसभरात ३३ चाचण्या करण्यात आल्या. यापैकी १९ जणांचे अहवाल निगेटिव्ह आले, अशी माहिती वैद्यकीय अधिकारी डॉ. नितीन चिवटे यांनी दिली.

कामेरीत १ फेब्रुवारीपासून ७ जूनअखेर दुसऱ्या लाटेत बाधितांची एकूण ३९४ संख्या झाली आहे. ६० रुग्ण उपचार घेत आहेत. कामेरी येथील बाधित रुग्ण रस्त्यावर फिरत असल्याच्या तक्रारी वारंवार ग्रामपंचायत व आरोग्य विभागाकडे येत होत्या. यामुळे शनिवारी दक्षता समितीच्या सदस्यांनी स्वत: बधितांच्या घरी भेट देऊन खात्री केली. त्यांनाही काही रुग्ण घरी नसल्याचे आढळून आले. यापुढे असे झाल्यास पोलीस कारवाई करण्याचा इशारा दक्षता समितीने दिला. मात्र लोकांचा रस्त्यावरील विनामास्क वावर व होम आयसोलेशनच्या रुग्णांचे घराबाहेर फिरणे यामुळे वाढणारा संसर्ग कसा राेखायचा, असा प्रश्न ग्रामपंचायत प्रशासन व दक्षता समितीसमाेर आहे.