इनाम धामणी येथे आढळला दुर्मीळ कवड्या साप

इनाम धामणी येथे आढळलेला पिवळ्या पट्ट्यांचा कवड्या साप

लोकमत न्यूज नेटवर्क

सांगली : इनाम धामणी (ता. मिरज) येथे पिवळ्या पट्ट्यांचा कवड्या साप आढळला. तो दुर्मीळ मानला जातो. घराजवळ साप आल्याचा निरोप गावातील महेश कोलप यांनी प्राणीमित्र मंदार शिंपी यांना दिला. शिंपी व अमोल कदम हे तेथे तातडीने पोहोचले. घराजवळ रचलेल्या विटांच्या थप्पीत साप जाऊन लपला होता. गावातील निखिल कोलप, कुणाल कोलप, सौरभ कोलप यांच्या विटा हटवण्यात आल्या, त्यानंतर साप बाहेर आला.

पाहताक्षणी तो मण्यारसारखा दिसला, त्यामुळे ग्रामस्थ घाबरले होते; पण निरीक्षण केल्यावर पिवळ्या पट्ट्यांचा कवड्या साप असल्याचे स्पष्ट झाले. निशाचर असलेला हा साप विषारी मण्यार सापासारखा दिसतो. त्यामुळे त्याला ठार मारण्याकडे लोकांचा कल असतो. शिंपी यांनी सांगितले की, पिवळ्या पट्ट्यांचा कवड्या बिनविषारी आहे. सामान्यत: शहरी व ग्रामीण रहिवासी भागात आढळतो. पाल, सरडे, कीटक हे खाद्य असल्यामुळे घरांच्या जवळ व दाट वस्त्यांमध्ये सापडतो. दिसायला देखणा व निरुपद्रवी आहे. शिंपी यांनी त्याला पकडून निसर्गात सोडून दिले.