भाजपच्या बैठकीत रंगले नाराजीनाट्य

सांगली : जिल्हा परिषद सदस्य बदलाच्या बैठकीत खासदार संजय पाटील यांचा चढलेला पारा सदस्यांत चर्चेचा विषय ठरला. भाजपचे प्रदेशाध्यक्ष चंद्रकांत पाटील यांच्यासोबत चर्चेसाठी ते आले, पण अवघ्या दोन-तीन मिनिटांतच तडकाफडकी बाहेर पडले.

चंद्रकांत पाटील रविवारी दिवसभर विविध बैठका व कार्यक्रमांसाठी सांगलीत होते, पण खासदार पाटील त्यांच्या एकाही कार्यक्रमात दिसले नाहीत. सकाळी विजयनगरला एका हॉटेलमध्ये पक्षाच्या सुकाणू समितीची बैठक होती. त्यावेळी आमदार सुधीर गाडगीळ, सुरेश खाडे यांच्यासह सर्व वरिष्ठ पदाधिकारी उपस्थित होते, मात्र खासदारांची अनुपस्थिती होती. ही बैठक संपतेवेळी ते आले. त्यावेळी चंद्रकांत पाटील जिल्हा परिषद पदाधिकारी बदलाच्या बैठकीसाठी अध्यक्षांच्या बंगल्यावर गेले. तेथे एका कक्षात चंद्रकांत पाटील बसले होते. खासदार पाटील त्यांना भेटून चर्चेसाठी आत गेले, पण अवघ्या दोन-तीन मिनिटांतच बाहेर आले. त्यावेळी त्यांच्या चेहऱ्यावरचे भाव काही तरी बिनसल्याचे सांगत होते.

बंगल्याबाहेर भाजपचे सर्व जिल्हा परिषद पदाधिकारी व सदस्य उपस्थित होते. त्यापैकी काहींनी खासदार पाटील यांच्याशी बातचित करण्याचा प्रयत्न केला, पण तोपर्यंत ते गाडीत जाऊन बसले होते. गाडीत बसताना झालेला दरवाजाचा मोठा आवाजही बरेच काही सांगणारा होता. खासदार निघाल्याचे पाहून बंगल्यातून एक व्यक्ती पळत गाडीकडे आला, दादा बोलवत असल्याचे त्याने सांगितले, पण खासदार थांबले नाहीत. खासदारांची ही गरमागरमीची भेट बरेच काही सांगणारी होती.

चौकट

जिल्हा परिषद बदलाची ठिणगी ?

काही सदस्यांनी सांगितले की, जिल्हा परिषदेतील बदलासाठी खासदार आग्रही होते. बदलाचा निर्णय आजच झाला पाहिजे. माझ्यासाठी काम केलेल्या कार्यकर्त्यांना संधी मिळायला हवी, अशी त्यांची मागणी होती, पण प्रदेशाध्यक्ष पाटील यांनी बदलाचा निर्णय लोंबकळत ठेवल्याचा राग खासदारांना आला. पहिल्यांदा महापालिकेचे पाहू, नंतर जिल्हा परिषदेची चर्चा करू, असा चंद्रकांत पाटील यांचा सूर होता, तो मान्य नसल्याने खासदार संतापले असावेत, अशी शक्यता सदस्यांनी व्यक्त केली.

------