जिल्हा पोलीस दलात खाकी वर्दीतील महिलांचे राज

लोकमत न्यूज नेटवर्क

सांगली : जनतेच्या सुरक्षेसाठी, कायदा सुव्यवस्था अबाधित राखण्यासाठी अहोरात्र कार्यरत असणाऱ्या पोलीस दलामध्ये चोवीस तास कार्यरत राहावे लागते. याच पुढच्या क्षणी कोणते आव्हान स्वीकारता येईल याचा अंंदाजही नसलेल्या पोलीस दलात महिलांनी आपल्या कामगिरीने ठसा उमटविला आहे. जिल्हा पोलीस, अपर पोलीस अधीक्षक पदासह इतर सर्व पदांवर आणि जबाबदारीच्या पदावरही या महिला आपली कामगिरी चोखपणे बजावत आहेत.

अपर पोलीस अधीक्षक पदावर कार्यरत असलेल्या मनीषा दुबुले यांची जिल्ह्यातील एन्ट्रीच मुळात महापुराच्या कालावधीत झाली. त्यांनीही या कालावधीत नवीन असल्याचा बाऊ न ठेवता झोकून देऊन काम केले. भिलवडी परिसरात त्यांनी मुक्काम करून पूरग्रस्तांना मदत करत कामकाजाची सुरुवात केली. जत येथे वयोवृद्ध महिलेवर झालेल्या अत्याचाराच्या तपासासाठी त्यांनी सलग ११ दिवस त्या परिसरात ठाण मांडून आरोपीला गजाआड केले. त्यांनी सामाजिक बांधीलकीही जपली आहे.

सांगली शहरातील वाहतूक नियाेजनाचे काम करणाऱ्या प्रज्ञा देशमुख यांनीही आव्हान म्हणूनच या विभागाचा पदभार स्वीकारला. पहिल्यांदाच एखादी महिला अधिकारी ट्रॅफिक विभागात दाखल झाली आहे. यापूर्वी त्यांनी महिला सहाय्यता कक्षातूनही प्रभावी काम करत अनेक मोडणारे संसार वाचवले आहेत.

अनैतिक मानवी वाहतूक कक्षाच्या सहायक निरीक्षक मायादेवी काळगावे यांनीही या विभागात अशीच उल्लेखनीय कामगिरी केली आहे.

याशिवाय कवठेमहांकाळ येथे कार्यरत दीपाली गायकवाड, विश्रामबाग पोलीस ठाण्यात कार्यरत सुशिीला खाडे यांनीही अशीच वेगळी कामगिरी नोंदविली आहे.

चौकट (फोटो)

पश्चिम महाराष्ट्रातील एकमेव महिला ‘डॉग हँडलर’

पोलीस दलातील श्वानपथकात कार्यरत असलेल्या शबाना आत्तार या पश्चिम महाराष्ट्रातील एकमेव महिला डॉग हँडलर ठरल्या आहेत. नऊ महिन्यांच्या प्रशिक्षणानंतर त्या कार्यरत झाल्या असून सध्या त्या ‘कूपर’ या श्वानाच्या माध्यमातून जिल्ह्यातील आव्हानात्मक गुन्ह्यांचा तपास करत आहेत. पोलीस अधीक्षक दीक्षित गेडाम, अपर अधीक्षक मनीषा दुबुले यांच्या मार्गदर्शनाखाली त्या कार्यरत आहेत.