कचरा उठावसाठी साडेअकरा कोटींची वाहन खरेदी

घनकचरा व्यवस्थापनासाठी १४ व्या वित्त आयोगातून ११ कोटी ४० लाख ७८८ रुपयांची विविध प्रकारची वाहने खरेदी करण्यात येणार आहेत. त्यावर महासभेत चर्चा झाली. उपमहापौर आनंदा देवमाने, करीम मेस्त्री, वहिदा नायकवडी, स्वाती शिंदे, शेखर इनामदार यांनी शहरातील घनकचरा गोळा करण्यासाठी वाहन खरेदी महत्त्वाची आणि गरजेची असल्याचे सांगितले.

गजानन मगदूम म्हणाले की, स्थायी समितीने घनकचरा प्रकल्प निविदा प्रक्रिया रद्दच्या ठराव केला असताना, वाहन खरेदी कशासाठी?

यावर आयुक्त कापडणीस म्हणाले की, निविदा प्रक्रिया रद्दचा ठराव विखंडित करण्यासाठी शासनाकडे पाठवला आहे. त्याचा आणि वाहने खरेदीचा काही संबंध नाही. दोन्ही वेगळे विषय आहेत. वाहने खरेदी १४ व्या वित्त आयोगाच्या निधीतून करण्यात येणार आहे. त्यातील ३२ कोटी रुपये शिल्लक आहेत. आयोगाची मुदत संपली असली, तरी निधी खर्च करण्याला कालमर्यादा नाही.

त्यासाठी मनुष्यबळ कसे भरती करणार, वाहनांच्या दुरुस्तीसाठी वर्कशॉप कुठे आहे, चौदाव्या वित्त आयोगाचा निधी वापरता येतो का, असे प्रश्‍न सदस्यांनी उपस्थित केले.

चौकट

माजी सैनिकांना मालमत्ता करात सूट

सभेत शासन आदेशाप्रमाणे माजी सैनिक आणि सैनिकांच्या विधवा पत्नींना मालमत्ता करात सूट देण्याचा निर्णय घेण्यात आला. मालमत्ता कर म्हणजे केवळ २२ टक्के सामान्य कर वगळला जातो. इतर कर तसेच असतात. त्यामुळे एकूणच सूट द्यावी, अशी मागणी ॲड. स्वाती शिंदे यांनी केली.