वांगीत येरळा नदीपात्रातील खड्डयांचे पंचनामे

कडेगाव : वांगी (ता. कडेगाव) येथे बेकायदा वाळू उपसाप्रकरणी महसूल विभागाने येरळा नदीपात्रातील खड्डयांचे पंचनामे केले, तर बेकायदा वाळू उपसाप्रकरणी संशयितांवर गुन्हे दाखल करण्यासाठी चिंचणी-वांगी पोलीस ठाण्यात पंचनामे दिले आहेत, अशी माहिती प्रांताधिकारी गणेश मरकड यांनी दिली.

मरकड म्हणाले, तालुक्यात येरळा व नांदणी नदीपात्रातून मोठ्या प्रमाणावर अवैध वाळूचा उपसा होत असल्याच्या नागरिकांच्या तक्रारी प्राप्त झाल्या होत्या. त्यामुळे येरळा व नांदणी नदीतून होणारा बेकायदा वाळू उपसा रोखण्यासाठी तलाठी व मंडल अधिकारी यांची पथके तयार केली असून, त्यांना वाळूचा अवैध उपसा रोखण्यासाठी सक्त आदेश देण्यात आले आहेत.

त्याप्रमाणे वांगी येथील तलाठी व मंडल अधिकारी यांना वांगी येथे येरळा नदी पात्रातून वाळूचा बेकायदा उपसा झाल्याचे आढळून आले. त्यामुळे त्यांनी नदीपात्रातून वाळू उपसा केलेल्या ठिकाणच्या खड्डयांचे पंचनामे केले. वांगी गावच्या हद्दीत त्यांनी एकूण ५०० ब्रासच्या खड्डयांचे पंचनामे केले आहेत. तालुक्यातील इतर गावातही येरळा व नांदणी नदी पात्रात बेकायदा वाळूचा उपसा झाल्याचा तक्रारी आहेत. तेथीलही पंचनामे महसूलच्या पथकाकडून केले जाणार आहेत. याप्रकरणी संबंधितांवर कठोर कारवाई केली जाणार आहे. तसेच दाेषींवर संबंधित पोलीस ठाण्यात गुन्हाही दाखल केला जाणार आहे.

वांगी येथे महसूल विभागाने अवैध वाळू उपसाप्रकरणी नदीपात्रातील खड्डयांचे केलेले पंचनामे चिंचणी - वांगी पोलिसात दिले असून, संबंधितांवर गुन्हे दाखल करण्यास सांगितले आहे.

चिंचणी - वांगी पोलीस ठाण्याचे सहाय्यक निरीक्षक संदीप साळुंखे म्हणाले, महसूलच्या पंचनाम्यात संबंधितांची नावे नसल्याने याबाबत अद्याप कोणावरही गुन्हे दाखल केले नाहीत. याबाबत वरिष्ठ अधिकाऱ्यांचे मार्गदर्शन घेऊन योग्य निर्णय घेतला जाईल.