महापौरपदाच्या निवडणुकीसाठी प्रदेशाध्यक्षांची प्रतिष्ठा

सांगली : सत्तास्थानी असलेल्या भाजप व विरोधी बाकावरील राष्ट्रवादी, काँग्रेस या पक्षांच्या नेत्यांनी महापौरपदाची निवडणूक प्रतिष्ठेची बनविली आहे. भाजप संख्याबळावर हे पद आपल्याकडेच राखण्याचा, तर चमत्कार करून हे पद आपल्याकडे खेचण्याचा प्रयत्न आघाडीकडून सुरू आहे. त्याची रणनीती ठरविण्यासाठी राष्ट्रवादीचे प्रदेशाध्यक्ष जयंत पाटील व भाजपचे प्रदेशाध्यक्ष चंद्रकांत पाटील हे रविवारी सांगलीत दाखल होणार आहेत.

महापालिकेच्या महापौर आणि उपमहापौरपदासाठी २३ फेब्रुवारी रोजी निवडणूक होत आहे. यामुळे सत्ताधारी भाजपमध्ये हालचाली सुरू झाल्या आहेत. महापौर गीता सुतार यांची मुदत २१ फेब्रुवारी रोजी संपणार आहे. महापौरपद खुले असल्याने इच्छुकांची संख्या वाढली आहे. सांगली महापालिकेत भाजपची एकहाती सत्ता आहे, भाजपचे संख्याबळ अपक्ष धरून ४३ इतके आहेत, तर विरोधी काँग्रेसचे १९, तर राष्ट्रवादीचे १५ सदस्य आहेत. सत्ताधारी भाजपकडून युवराज बावडेकर, धीरज सूर्यवंशी, निरंजन आवटी, अजिंक्य पाटील यांची नावे चर्चेत आहेत.

भाजपमध्ये इच्छुकांची संख्या जास्त असल्याने ऐनवेळी नाराजीचा सामना करावा लागू नये म्हणून भाजपची कोअर कमिटी चिंतेत पडली आहे. सांगली महापालिकेत बहुमत असतानाही भाजपाला प्रशासनाशी मिळते-जुळते घ्यावे लागत असल्याने सदस्यही नाराज आहेत.

राष्ट्रवादीकडून मैनुद्दीन बागवान, दिग्विजय सूर्यवंशी, विष्णू माने, काँग्रेसकडून उत्तम साखळकर, मंगेश चव्हाण हे इच्छुक आहेत. काँग्रेसच्या राजकीय भूमिकेवर राष्ट्रवादीची भूमिका अवलंबून आहे. काँग्रेस चमत्काराच्या प्रतीक्षेत आहे. आता भाजपचे वरिष्ठ नेते नेमके कोणाला महापौरपदाची संधी देतात, याकडे सर्वांचे लक्ष लागले आहे. भाजपाच्या कोअर कमिटीतही अतंर्गत मतभेद आहेत.

महापौर निवडणूक जाहीर होताच सर्व पक्षांमध्ये जोरदार हालचाली सुरू झाल्या आहेत. भाजपचे प्रदेशाध्यक्ष चंद्रकांत पाटील आणि राष्ट्रवादीचे प्रदेशाध्यक्ष व पालकमंत्री जयंत पाटील हे रविवारी सांगलीत नगरसेवकांच्या बैठका घेणार आहेत. दोघांनीही निवडणूक प्रतिष्ठेची बनवली आहे. या दिग्गज नेत्यांच्या बैठकांमध्ये महापौर उमेदवारीवर निर्णय होण्याची शक्यता आहे.

चौकट

आघाडीत सूर जुळेनात

काँग्रेस व राष्ट्रवादी एकत्रितपणे महापौरपदाची निवडणूक लढविणार असली तरी महापौरपदाचा उमेदवार कोणाचा यावरून सूर जुळत नसल्याचे चित्र आहे. त्यामुळे हे सूर जुळले नाहीत, तर भाजपचा मार्ग सुकर होणार आहे.