वारणा पाणी योजनेचा आराखडा तयार करा

लोकमत न्यूज नेटवर्क

सांगली : महापालिकेच्या वारणा पाणी योजनेच्या स्वप्नपूर्तीसाठी प्रशासन व सदस्यांनी पुढाकार घ्यावा. या योजनेचा आराखडा व अंदाजपत्रक तयार करावे, अशी सूचना काँग्रेस नेत्या जयश्रीताई पाटील यांनी बुधवारी केली.

श्रीमती पाटील यांच्या उपस्थितीत महापालिकेत बैठक झाली. यावेळी आयुक्त नितीन कापडणीस, उपमहापौर उमेश पाटील, विरोधी पक्षनेते उत्तम साखळकर, उपायुक्त राहुल रोकडे, शहर अभियंता संजय देसाई यांच्यासह काँग्रेसचे नगरसेवक उपस्थित होते. बैठकीत वारणा उद्भभव पाणी योजनेवर चर्चा झाली. ही योजना दिवंगत मदनभाऊंचे स्वप्न होते. पाणी योजनेतील बहुतांश कामे पूर्ण झाली आहे. आता वारणेतून पाणी उचलून ते सांगली व कुपवाडला देण्यासाठी सर्वे करून अंदाजपत्रक तयार करण्याची सूचना करण्यात आली. आयुक्त कापडणीस यांनीही जीवन प्राधिकरणाकडून योजनेचे अंदाजपत्रक तयार करून ते महासभेसमोर सादर करू. सदस्यांच्या मान्यतेनंतर शासनाकडे पाठविले जाईल, अशी ग्वाही दिली.

शामरावनगर येथील पाण्याच्या निचरा करण्यासाठी तातडीने उपाययोजना करण्याची सूचनाही करण्यात आली. गुंठेवारी भागात तातडीने मुरूमाचा पुरवठा करावा, अशी मागणी सदस्यांनी केली. शहरात महिलांसाठी पिंक टाॅयलेट उभारण्याचा निर्णयही बैठकीत घेण्यात आला. कुपवाड स्मशानभूमीत पायाभूत सुविधा, विस्तारित भागात ड्रेनेजची व्यवस्था आणि गंजीखानाच्या जागेवर बगीचा करण्यावर बैठकीत चर्चा झाली.

यावेळी नगरसेवक संजय मेंढे, वर्षा निंबाळकर, मदिना बारुदवाले, रोहिणी पाटील, शुभांगी साळुंखे, मंगेश चव्हाण, फिरोज पठाण, संतोष पाटील, अभिजित भोसले, माजी नगरसेवक हणमंत पवार, मदनभाऊ युवा मंचाचे जिल्हाध्यक्ष आनंद लेंगरे, संजय कांबळे, प्रशांत पाटील उपस्थित होते.