म्हैसाळ योजनेचे आवर्तन फेब्रुवारीत सुरू करण्याची तयारी

मिरज : अतिवृष्टीमुळे पाणी उपलब्ध असल्याने यंदा म्हैसाळ योजनेचे आवर्तन फेब्रुवारीअखेर सुरू होण्याची शक्यता आहे. यावर्षी नोव्हेंबर, डिसेंबर महिन्यात आवर्तन सुरू करण्याची गरज भासलेली नाही. पावसाळ्यात आवर्तन सुरू करुन मिरज तासगाव, जत व कवठेमहांकाळ तालुक्यातील ९१ गावांतील १५९ तलाव भरल्याने पिण्याच्या पाण्याचीही टंचाई दूर झाली आहे.

म्हैसाळ योजनेमुळे गेल्या काही वर्षात मिरज पूर्व भागासह जत व कवठेमहांकाळ तालुक्यातील टंचाईग्रस्त गावांना दिलासा मिळाला आहे. मात्र म्हैसाळचे पोटकालवे अपूर्ण असल्याने पाणी वाटपासाठी वर्षातून दोन वेऴा आवर्तन सुरु करावे लागते. दरवर्षी फेब्रुवारीपासून उन्हाळी व पावसाळ्यानंतर नोव्हेंबर-डिसेंबरमध्ये म्हैसाळचे आवर्तन सुरू करण्यात येते. यावर्षी तीनही तालुक्यात चांगला पाऊस झाल्याने ओढे, नाले अद्याप वाहत आहेत. पाण्याला मागणी नसल्याने नोव्हेंबर, डिसेंबरचे आवर्तन रद्द करुन फेब्रुवारीत आवर्तन सुरू करण्याची तयारी सुरु आहे. म्हैसाळ योजना सुरू असतानाही तीन तालुक्यांतील काही गावांत पिण्याच्या पाण्याच्या टंचाईला तोंड द्यावे लागते. मात्र यावर्षी पुराचे पाणी दुष्काळी भागात पोहोचविण्यासाठी १७ ऑगस्ट ते १७ सप्टेंबरपर्यंत आवर्तन सुरु करुन तीन तालुक्यातील तलाव भरण्यात आले. यासाठी तब्बल पावणेदोन टीएमसी पाण्याचा उपसा करण्यात आला. यामुळे तलाव ओढे, नाले भरले असल्याने जमिनीच्या पाणी पातळीत वाढ होऊन विहिरी, कूपनलिकांना पाणी आहे. म्हैसाळ योजनेतून अनेक गावांतील तलाव भरल्याने, नेहमी उन्हाळ्यात पाणी टंचाईला तोंड द्यावे लागणाऱ्या टंचाईग्रस्त गावांत यावर्षी दिलासा मिळाला आहे. सध्या म्हैसाळ योजना बंद असल्याने कालवे व वितरिकांच्या अस्तरीकरणाची कामे सुरू आहेत.

चाैकट

तलावातील पाणीसाठा

मिरज : ३४ गावे, ६८ तलाव, २६५ दशलक्ष घनफूट पाणीसाठा

तासगाव : ८ गावे, ८ तलाव, २१७ दशलक्ष घनफूट पाणीसाठा

कवठेमहांकाळ : २६ गावे, ४१ तलाव, ३६६ दशलक्ष घनफूट पाणीसाठा

जत : २३ गावे, ४१ तलाव, ५१८ दशलक्ष घनफूट पाणीसाठा

फाेटाे : १३ मिरज २..३