मिरजेत विसर्जन मिरवणुकांची तयारी पूर्ण

मोठा बंदोबस्त : १८५ सार्वजनिक मंडळांच्या गणरायांना रविवारी निरोप, स्वागत कमानी सजल्या

मिरज : मिरजेत गणेश विसर्जन मिरवणुकीला रविवार, दि. २७ रोजी सुरुवात होणार आहे. सुमारे १८५ सार्वजनिक मंडळांच्या गणेश मूर्तींचे सवाद्य मिरणुकीने विसर्जन होणार आहे. यामुळे शहरात मोठा पोलीस बंदोबस्त तैनात करण्यात आला असून, विसर्जन मिरवणुकीच्या पार्श्वभूमीवर आज पोलिसांनी प्रमुख मार्गावरून संचलन केले.
मोठ्या मूर्तींची स्थापना केलेल्या ४५ मंडळांच्या गणेश मूर्तींचे कृष्णाघाटावर व १४० मंडळांच्या गणेश मूर्तींचे गणेश तलावात विसर्जन करण्यात येणार आहे. मिरवणूक मार्गावर दुतर्फा विविध पक्ष व संघटनांनी उभारलेल्या स्वागत कमानी विद्युत रोषणाईने झगमगत आहेत. डॉल्बीवर प्रतिबंध असल्याने बँड, बेंजो, झांज, ढोल, लेझीम व पारंपरिक वाद्यांचा वापर रात्री १२ वाजेपर्यंत करण्यास पोलिसांनी परवानगी दिली आहे.
वाद्यांच्या ध्वनी मापनासाठी पोलिसांची ३ पथके नियुक्त केली आहेत. कृष्णा घाट व गणेश तलाव येथे महापालिकेतर्फे यांत्रिक बोट, तराफा, क्रेन व निर्माल्य कुंडांची व्यवस्था करण्यात आली आहे. मोठ्या आकाराच्या मूर्तींचे कृष्णाघाटावर क्रेनव्दारे नदीपात्रात विसर्जन करण्यात येणार आहे.
विसर्जन मिरवणुकीसाठी पोलिसांचा मोठा फौजफाटा तैनात आहे. पोलीस अधीक्षक सुनील फुलारी यांच्यासह बंदोबस्तासाठी जिल्ह्यातील पोलीस फौजफाटा मिरजेत पाचारण करण्यात आला आहे. सुरक्षेसाठी मिरवणूक मार्गावर गणेश तलाव ते पोलीस ठाण्यापर्यंत ३० ठिकाणी सीसीटीव्ही कॅमेरे बसवण्यात आले आहेत. पंधरा फिरत्या कॅमेऱ्यांव्दारे मिरवणुकीवर पोलिसांची नजर ठेवण्यात येणार आहे. महिला छेडछाड विरोधी, मद्यपी वाहन चालविणाऱ्यांवर कारवाईसाठी, दंगल नियंत्रक अशी साध्या वेशातील पथके मिरवणुकीत कार्यरत असणार आहेत. विसर्जनासाठी वेळेचे बंधन न पाळणाऱ्या मंडळांवर कारवाई करण्यात येणार आहे.
मंडळांनी मिरवणुकीसाठी सजीव देखावे व आकर्षक सजावट केली आहे. मिरवणूक मार्गावर विश्वशांती मंडळ, मनसे, मराठा महासंघ, शिवसेना, हिंदू एकता, एकता मित्र मंडळ, धर्मवीर संभाजी मंडळांसह विविध मंडळांनी स्वागत कमानी उभारल्या आहेत. महापालिका, जनसुराज्य शक्ती, रिपाइं, शिवसेनेतर्फे स्वागत कक्ष उभारण्यात आले आहेत. मिरवणुकीवर उंच मनोऱ्यातून व इमारतींवरून शस्त्रधारी पोलीस लक्ष ठेवणार आहेत. मिरवणूक रेंगाळत ठेवून उशिरा विसर्जन करणाऱ्या मंडळांवर व मद्यपान करून शांतता भंग करणाऱ्यांवर कारवाई करणार असल्याचे पोलिसांनी सांगितले. मिरवणूक मार्गावर रात्रीच्या अंधारातील चित्रण होणारे सीसीटीव्ही कॅमेरे बसविले आहेत. (प्रतिनिधी)
पोलीस मदत केंद्र
विसर्जन मिरवणुकीसाठी शहरातील वाहतूक व्यवस्थेत बदल करण्यात आला असून, बाहेरून येणाऱ्या वाहनांना मिरवणूक मार्गावर प्रतिबंध करण्यात आला आहे. मिरवणूक मार्गावरील दुय्यम रस्ते, बोळ बंद करण्यात आले आहेत. प्रमुख सात चौक व मिरवणूक मार्गावरील उंच इमारतींवर शस्त्रधारी पोलीस व कॅमेरे तैनात करण्यात आले आहेत. मिरवणुकीतील गर्दीत हरवलेल्या, सापडलेल्या लहान बालके व व्यक्तींसाठी पोलीस मदत केंद्र स्थापन करण्यात आले आहे.
मिरवणुकीच्या पार्श्वभूमीवर पोलिसांनी आज शहरातील प्रमुख मार्गावरून संचलन केले. रविवारी सकाळपासून पोलीस बंदोबस्तास सुरुवात होत असून, सोमवारी सकाळपर्यंत २४ तास मिरवणूक सुरू राहण्याची शक्यता आहे. शुक्रवारी नवव्यादिवशी पहाटेपर्यंत विसर्जन मिरवणूक सुरू होती. मिरवणुकीत पोलिसांचा प्रतिबंध झुगारून डॉल्बीचा वापर करणाऱ्या काही मंडळांवर पोलीस कारवाई करणार आहेत.