प्रहार शेतकरी संघटना राष्ट्रवादीच्या तंबूत;

लोकमत न्यूज नेटवर्क

इस्लामपूर : कडकनाथ प्रकरणाविरोधात लढणारे प्रहार शेतकरी संघटनेचे जिल्हाध्यक्ष दिग्विजय पाटील राष्ट्रवादीच्या तंबूत जाऊन पालिका निवडणुकीत उतरण्याच्या तयारीला लागले आहेत. राष्ट्रवादीने प्रहार संघटनेला काही जागा दिल्या नाहीत, तर दोन ते तीन प्रभाग लढविण्याची तयारी त्यांनी दर्शविली आहे.

राज्यमंत्री बच्चू कडू यांच्या नेतृत्वाखाली असलेल्या प्रहार शेतकरी संघटनेत २०१५ पासून दिग्विजय पाटील कार्यरत आहेत. इस्लापूरसह ग्रामीण भागातही त्यांच्या संघटनेच्या शाखा आहेत. पाटील यांनी संघटनेच्या माध्यमातून विविध सामाजिक उपक्रम राबविले आहेत. विशेषत: मोफत रुग्णवाहिका सेवा उपलब्ध करून दिली आहे. कोरोना महामारीच्या काळात वाळवा, शिराळा तालुक्यातील जवळजवळ २ हजार रुग्णांना कोविड सेंटरवर विनामोबदला नेले आहे. तसेच कोरोनाने मृत्युमुखी पडलेल्यांचे मृतदेह रुग्णवाहिकेद्वारे स्मशानभूमीपर्यंत वाहून नेण्याची सेवाही त्यांच्या संघटनेने केली आहे. हे त्यांचे कार्य कोरोना योध्द्यांच्या पलीकडे आहे. इस्लामपूर शहरातील सुविधांचा अभाव, विकासाचे वाजलेले तीनतेरा, निकृष्ट कामाचा दर्जा आदी परिस्थिती पाहून आगामी पालिकेच्या निवडणुकीत उतरण्याचे प्रहार शेतकरी संघटनेने निश्चित केले आहे. याला संघटनेचे संस्थापक बच्चू कडू यांनीही हिरवा कंदील दाखविला आहे.

राज्यात महाआघाडी सरकार असल्याने या सरकारमध्ये प्रहार संघटना घटकपक्ष म्हणून कार्यरत आहे. त्यामुळेच राष्ट्रवादीच्या कोट्यातून दिग्विजय पाटील प्रभाग ११ मध्ये लढण्याची तयारी करत आहेत. परंतु राष्ट्रवादी या संघटनेला कितपत न्याय देईल, हे पाहावे लागेल.

कोट

इतर संघटनांपेक्षा प्रहार संघटनेकडे कार्यकर्त्यांची फळी मोठी आहे. या संघटनेत युवाशक्ती मोठी आहे. त्यामुळे आगामी पालिका निवडणुकीत प्रहार शेतकरी संघटना राष्ट्रवादीकडे काही जागा मागणार आहे. राष्ट्रवादीने याचा विचार नाही केला, तर ही संघटना दोन ते तीन प्रभाग स्वबळावर लढेल.

- दिग्विजय पाटील, जिल्हाध्यक्ष, प्रहार शेतकरी संघटना

फोटो -०४१२२०२०-आयएसएलएम- दिग्विजय पाटील