शहरात वन-वे नावालाच

सांगली : दैनंदिन धावपळीत वन-वेच्या नियमांना हरताळ फासण्यात सांगलीकर आघाडीवर आहेत. वाहतुकीचे नियम केवळ नावालाच आहेत, याची वारंवार प्रचिती येते. विशेषत: शहरातील वर्दळीच्या रस्ते व बाजारपेठेत या नियमभंग करण्याचे प्रमाण अधिक आहे. त्यात अपुऱ्या कर्मचाऱ्यामुळे वाहतूक पोलिसांनाही त्यावर नियंत्रण ठेवणे अनेकदा शक्य होत नाही. शहरात गावठाण परिसर, मुख्य बाजारपेठा, बसस्थानक, मार्केट यार्डसह काही ठिकाणी वाहतुकीची कोंडी टाळण्यासाठी वन-वे करण्यात आले आहेत. पण वाहनधारकांकडून शिस्त पाळली जात नाही. विशेषत: दुचाकीस्वारांचे बेशिस्ती वाढली आहे.

चौकट

वाहतूक नियमांना ‘खो’

वाहनचालकांकडून वाहतुकीच्या नियमांना खो घातला जात आहे. सिग्नल तोडण्यापासून ते वन-वेच्या नियमापर्यंत कुणीच त्याबाबत फारसे गंभीर दिसत नाही. कापडपेठेतील रस्त्यावर तर नेहमीच दुचाकीस्वार वन-वेच्या नियमांचा भंग करत असतात. तीच अवस्था आनंद चित्रमंदिर ते तरुण भारत क्रीडांगण व हरभट रोड ते तरुण भारत क्रीडांगणावरील रस्त्यांची आहे. बसस्थानक परिसरातही वन-वेचा नियम मोडण्याचे प्रमाण अधिक आहे.

चौकट

वाहतूक पोलिसांची कसरत

शहरात वाहतुकीचे नियमन करण्यासाठी चौकाचौकांत पोलीस तैनात करण्यात आले आहे. पण रस्ते, चौकांची संख्या पाहता वाहतूक पोलिसांचे मनुष्यबळ कमी पडते. त्यामुळे प्रत्येक ठिकाणी पोलिसांचा बंदोबस्त तैनात करणे शक्य होत नाही. नेमका याचा गैरफायदा वाहनचालक घेत असतात. काहीवेळा वन-वेच्या रस्त्यावर पोलिसांचा तैनात असतात. तर बहुतांश वेळा तिथे पोलीस नसतात.

चौकट

रस्त्यावरच होते पार्किंग

शहरात पार्किंग समस्या दिवसेदिवस गंभीर होत चालली आहे. बाजारपेठेत तर पार्किंगसाठी पुरेशी जागा नसल्याने रस्त्यावर वाहने पार्क केली जातात. त्यात दुकानदारांनी रस्त्यावर अतिक्रमण करून दुकानातील माल बाहेरच डिस्प्ले केलेला आहे. मारुती रोडवर हा प्रकार अधिक आहे. दुकानदारासोबतच किरकोळ विक्रेते, भाजीपाला विक्रेत्यांनी रस्ते काबीज केले आहेत.

चौकट

महिन्यात पंधरा हजारांचा दंड वसूल

शहरात वाहतुकीला शिस्त लावण्याचा प्रयत्न सुरू आहे. विशेषत: बाजारपेठेत वाहतुकीची मोठी कोंडी होत आहे. त्यावर नियंत्रण आणण्यासाठी महापालिकेच्या सहकार्याने नियोजन सुरू आहे. मारुती रोड रस्त्यावर दुकानदारांनी अतिक्रमण केले आहे. हा रस्ता प्रशस्त आहे. त्यामुळे रस्त्यावर वाहने पार्क होतात. त्यावर शनिवारपासून कारवाईची मोहीम हाती घेणार आहे. वन-वेच्या नियमांचे पालन वाहनचालकांनी करणे बंधनकारक आहे. या नियमांचे उल्लंघन करणाऱ्या बेशिस्त वाहनचालकांवरही कारवाई करत आहोत. जानेवारी महिन्यात वन वेच्या नियमांचे उल्लंघन करणाऱ्यांकडून पंधरा हजारांचा दंड वसूल केला आहे.