जतमध्ये ट्रकखाली सापडून वृद्ध ठार

फोटो-०९जत१

लोकमत न्यूज नेटवर्क

जत : जत शहरातील संभाजी चौकालगत दर्ग्यासमोर ट्रकखाली सापडून एकजण ठार झाला. सदाशिव कल्लाप्पा व्हनखंडे (वय ६८ रा. कणसेवाडा, शिवाजी पेठ, जत) असे मृताचे नाव आहे. ही घटना शुक्रवारी सायंकाळी ४ वाजता घडली. जत पोलीस ठाण्यात घटनेची नोंद झाली आहे.

सदाशिव व्हनखंडे हे मंगळवार बाजार पेठेतून घराकडे येत होते. यावेळी सोलंकर चौकातून संभाजी चौकाकडे ट्रक (एम.एच. ४४. वाय ५७३५) हा ट्रक निघाला होता. संभाजी चौकालगत असलेल्या महीबूब सुभानी दर्ग्यासमोर अरुंद रस्ता आहे. या अरुंद रस्त्यालगत नागरिकांनी दगड टाकले आहेत. त्यामुळे रस्ता आणखी अरुंद झाला आहे. या ठिकाणाहून जाताना सदाशिव व्हनखंडे यांना ट्रकचा धक्का लागून ते खाली पडले. यावेळी ट्रकचे पाठीमागील चाक त्यांच्या डोक्यावरून गेले. यामुळे त्यांचा जागीच मृत्यू झाला.

ही घटना घडल्यानंतर ट्रकचालकाने ट्रक तसाच पुढे संभाजी चौक पार करून पुढे नेला होता. परंतु नागरिकांनी त्याचा पाठलाग करून थांबविले. त्यानंतर ट्रकचालकाने ट्रक तेथेच सोडून पलायन केले.

सदाशिव व्हनखंडे हे जत येथे एकटे राहून चर्मकार व्यवसाय करत होते. त्यांच्या पत्नीचे काही दिवसांपूर्वी निधन झाले असून, त्यांच्या पश्चात तीन मुली, मुलगा असा परिवार आहे. तिन्ही मुलींची लग्न झाले असून मुलगा पुणे येथे नोकरी करत आहे. अचानक घडलेल्या या घटनेमुळे संत रोहिदासनगर परिसरात हळहळ व्यक्त केली जात आहे. या प्रकरणाचा पुढील तपास पोलीस हवालदार अर्चना खांडेकर करत आहेत.