आधार कार्डावर पूर्ण जन्मतारीख नाही ? मग कोरोनाची लस मिळणार नाही

सांगली : तुमचे आधार ओळखपत्र अपडेटेड नसल्यास कोरोनाची लस मिळणार नाही. होय, हे खरे आहे. लसीकरणाच्या नोंदीसाठी कोविन २.० पोर्टलवर नोंदणी करावी लागते, मात्र त्यासाठी अपडेटेड आधार ओळखपत्र आवश्यक आहे.

केंद्र सरकारच्या कोविन २.० पोर्टलवर नोंदणी केल्यानंतर कोरोनाची लस मिळते. नोंदणीवेळी लाभार्थीची जन्मतारीख घेतली जाते. लाभार्थी व्यक्ती ४५ वर्षांपुढील वयाची असल्याची नोंद होते. आधार ओळखपत्रावर पूर्ण जन्मतारीख नसल्यास लसीसाठी नोंद होऊ शकत नाही. सध्या अनेकांना ही अडचण भेडसावू लागली आहे. काही वर्षांपूर्वी आधार ओळखपत्रे काढण्याची मोहिम सुरु झाली, तेव्हा पहिल्या टप्प्यात अनेकांनी फक्त जन्मवर्ष सांगून आधार ओळखपत्र घेतले. आजही अनेकांच्या ओळखपत्रावर जन्माचा दिवस व महिना यांची नोंद नाही. कोरोनाच्या लसीकरण पोर्टलवर अशी ओळखपत्रे नाकारली जात आहेत, त्यामुळे लस हवी असल्यास ओळखपत्र अपडेट करुन घ्यावे लागेल.

सध्या जिल्हाभरात आधार प्रमाणिकरण केंद्रे सुरु आहेत. जन्माविषयी कोणताही अधिकृत दस्तऐवज दाखविल्यास ५०-१०० रुपयांत जन्मतारखेची पूर्ण नोंद करुन दिली जाते. आठवडा-पंधरा दिवसांत पूर्ण जन्मतारखेसह नवे आधार ओळखपत्र मिळते, त्यामुळे लस घेऊ इच्छिणाऱ्यांनी ओळखपत्र अपडेट करुन घेण्याचे आवाहन आरोग्य विभागाने केले आहे.

चौकट

हे देखील चालेल

आधार ओळखपत्रात पूर्ण जन्मतारीख नसल्यास पॅन कार्ड, पासपोर्ट किंवा कोणतेही शासकीय सचित्र ओळखपत्र ग्राह्य धरले जात आहे. त्यावर पूर्ण जन्मतारीख अपेक्षित आहे.