लोकमत न्यूज नेटवर्क, सांगली : प्रत्येक महिन्याला दहा टक्के परतावा देतो, तसेच गुंतवणुकीची रक्कम दामदुप्पट करण्याचे आमिष दाखवत जिल्ह्यातील राष्ट्रवादी काँग्रेस शरदचंद्र पवार पक्षाचे पदाधिकारी ताजुद्दीन गुलाब तांबोळी (वय ४८, रा. सावळज, ता. तासगाव) यांची ४६ लाख रुपयांची फसवणूक केल्याचा प्रकार उघडकीस आला आहे. याप्रकरणी मौलासाब हसनसाब कोलार (रा. मिरज) याच्याविरुद्ध संजयनगर पोलिस ठाण्यात गुन्हा दाखल करण्यात आला आहे.
अधिक माहिती अशी, ताजुद्दीन तांबोळी हे राष्ट्रवादी काँग्रेस शरदचंद्र पवार पक्षाचे जिल्हा कार्याध्यक्ष म्हणून कार्यरत आहेत. त्यांचा सावळज येथे हॉटेल व्यवसाय आहे. तांबोळी हे काही वर्षांपासून सांगलीत पंचशीलनगर येथे राहतात. चार वर्षांपूर्वी संशयित मौलासाब कोलार याची तांबोळी यांच्याशी ओळख झाली. तेव्हा कोलार याने त्यांचा विश्वास संपादन केला. कमी कालावधीत पैसे दामदुप्पट करून देण्याचे आमिष दाखविले. तसेच दर महिन्याला गुंतवणुकीच्या रकमेवर दहा टक्के परतावा देण्याचे आश्वासन दिले. त्यामुळे तांबोळी यांनी कोलार याच्या बोलण्यावर विश्वास ठेवून ४५ लाख ८७ हजार रुपयांची गुंतवणूक त्याच्याकडे केली. जून २०२१ ते डिसेंबर २०२१ या कालावधीत पंचशीलनगर येथे हा व्यवहार झाला होता.
गुंतवणुकीनंतर पहिले दोन-तीन महिने संशयित कोलार याने तांबोळी यांना परतावा दिला. परंतु त्यानंतर मात्र त्याने परतावा देण्यास टाळाटाळ सुरू केली. तांबोळी यांनी गुंतवणुकीच्या रकमेबाबत वारंवार पाठपुरावा केला. तेव्हा कोलार याने उडवाउडवीची उत्तरे दिली. गेली तीन-चार वर्षे पाठपुरावा केल्यानंतर तांबोळी यांना आपली फसवणूक झाल्याचे लक्षात आले. त्यांनी संजयनगर पोलिस ठाण्यात संशयित कोलार याच्याविरोधात दि. २१ रोजी तक्रार दाखल केली. त्यानुसार पोलिसांनी कोलार याच्याविरोधात फसवणुकीचा गुन्हा दाखल केला आहे. त्याचा शोध सुरू केला आहे.
कोलारविरुद्ध विश्रामबागला गुन्हा
पैसे दुप्पट करून देण्याचे आमिष दाखवून कोलार याने ७५ लाख रुपयांची फसवणूक केल्याबद्दल राजन विजय चव्हाण (रा. गव्हर्मेंट कॉलनी) यांनी विश्रामबाग पोलिस ठाण्यात २०२२ मध्ये फिर्याद दिली आहे. संशयित कोलार हा मूळचा कर्नाटकचा आहे.
दामदुपटीच्या आमिषाने अनेकांची फसवणूक
कोलार याने मिरजेत एका इमारतीमध्ये ऑफिस सुरू केले होते. दामदुपटीचे आमिष दाखवून त्याने अनेकांना गुंतवणूक करण्यास सांगितले. सुरुवातीला परतावा देऊन तो विश्वास संपादन करत होता. त्यानंतर पैसे मागताच उडवाउडवीची उत्तरे देऊन त्याने अनेकांची फसवणूक केली आहे.