इस्लामपुरात ‘कृष्णे’साठी राष्ट्रवादीचे उमेदवार आमने-सामने

इस्लामपूर : वाळवा तालुक्यातील बोरगाव-रेठरेहरणाक्ष गटातून तिन्ही पॅनलमधून एकूण चार इच्छुकांनी अर्ज दाखल केले आहेत. तीन उमेदवार जलसंपदा मंत्री जयंत पाटील यांचे समर्थक आहेत तर एक उमेदवार स्व. एम. डी. पवार यांच्या घरातील आहे. संस्थापक पॅनलमधून दोघांपैकी एकजण कोण माघार घेणार, यावरच निर्णय होणार आहे. राष्ट्रवादी पक्षातीलच उमेदवार एकमेकांविरोधात उभे असणार आहेत.

गत निवडणुकीत माजी नगराध्यक्ष स्व. विजयभाऊ पाटील यांच्या मार्गदर्शनाखाली त्यांचेच चुलतभाऊ संजय पाटील यांनी सहकार पॅनलमधून निवडणूक लढवली होती. त्यांच्याविरोधात संस्थापक पॅनलकडून युवराज पाटील यांनी आव्हान दिले होते. संस्थापक पॅनलच्या बाजूने राष्ट्रवादीचे शहराध्यक्ष शहाजी पाटील यांचे मार्गदर्शन होते. या निवडणुकीत मात्र शहाजी पाटील यांनी घुमजाव करून सहकार पॅनलचा प्रचार सुरू केला आहे. सहकार पॅनलविरोधात रयत पॅनलचे उमेदवार, माजी नगराध्यक्ष आनंदराव मलगुंडे यांनी आपले प्रचार दौरे सुरू केले आहेत. त्यांच्याबरोबर राष्ट्रवादीच्या जिल्हाध्यक्ष छायाताई पाटील यांचे पती प्रा. अनिल पाटील (कामेरी) हे सहभागी आहेत. आनंदराव मलगुंडे हे जलसंपदा मंत्री जयंत पाटील आणि माजी मंत्री अण्णासाहेब डांगे यांचे समर्थक आहेत. सहकारचे संजय पाटील आणि रयतचे आनंदराव मलगुंडे यांची लढत चुरशीची होणार असल्याची चर्चा बोरगाव-रेठरेहरणाक्ष गटात आहे.

गत निवडणुकीत उभे राहिलेले युवराज पाटील यांनी पुन्हा संस्थापक पॅनलकडून आपला अर्ज दाखल केला आहे. आपली उमेदवारी निश्चित असल्याचे ते मानतात. तर याच पॅनलकडून स्व. एम. डी. पवार यांच्या घरातील माजी नगरसेवक शिवाजी पवार यांनीही आपला अर्ज दाखल केला आहे. या दोघांपैकी कोण? याचा निर्णय अद्यापही झाला नसल्याने दोघांनीही संपर्क दौरे सुरू केले आहेत. शिवाजी पवार यांना त्यांचेच बंधू काॅंग्रेसचे नगरसेवक वैभव पवार यांनी समर्थ साथ दिली आहे. एकंदरीत इस्लामपुरात तिघे उमेदवार राष्ट्रवादी पक्षाचे आहेत. परंतु, त्यांनी एकमेकांविरुद्ध दंड थोपटले आहेत. शिवाजी पवार ‘एकला चलो’ची भूमिका घेऊन संस्थापक पॅनलच्या माध्यमातून प्रचाराला लागले आहेत.

चौकट

पालिकेच्या राजकारणात स्व. एम. डी. पवार यांच्या घरातील विद्यमान विकास आघाडीचे नगरसेवक वैभव पवार यांनी त्यांच्याच घरातील माजी नगरसेवक शिवाजी पवार यांना विरोध केला होता. वैभव पवार यांचे वडील स्व. अशोक पवार हे सहकार पॅनलमधून संचालक होते. वैभव पवार यांनी यापूर्वी रयत पॅनलकडूनही उमेदवारी मागितली होती. आता संस्थापक पॅनलचे उमेदवार शिवाजी पवार यांच्या ते पाठीशी आहेत.