चौंडेश्वरी देवीचा नवरात्रोत्सव उत्साहात

आष्टा : येथील श्री चौंडेश्वरी देवीचा शाकंभरी नवरात्रोत्सव गुरुवार दिनांक २१ ते २८ जानेवारी अखेर परंपरागत पद्धतीने उत्साहात साजरा करण्यात आला.

उत्सवकाळात पहाटे देवीस अभिषेक, महापूजा, सकाळी ७ ते ८ आरती, छबिना सकाळी ८ ते ९, दुर्गा सप्तशती पाठ व ह.भ.प. प्रकाश महाजन यांच्या सत्संगाचा कार्यक्रम झाला. सायंकाळी आरती व छबिना तसेच रात्री प्रवचन, व्याख्यान, भजन यासह देवीचा जागर, गोंधळ, भक्तिगीतांचा कार्यक्रम झाला. तसेच गुरुवारी सकाळी संदीप शास्त्री यांच्या मार्गदर्शनाखाली थोरात सरकार यांच्या उपस्थितीत नवचंडी होम झाला तसेच कुमारिका व सौभाग्यवती पूजन करण्यात आले. उत्सवकाळात संतोष गुरव, शीतल गुरव व महेश गुरव यांच्यासह मंदार माळी यांनी देवीची आकर्षक पूजा बांधली. मंदिराला आकर्षक विद्युत रोषणाई करण्यात आली होती. गुरुवार, दि. २८ पासून शाकंभरी नवरात्रोत्सव समितीच्या वतीने शहरातील विविध भागांत भाविकांना लाडूच्या प्रसादाचे वाटप करण्यात येत आहे.

फोटो : २९०२२०२१-आयएसएलएम-आष्टा चौंडेश्वरी न्यूज

श्री चौंडेश्वरी देवीच्या शाकंभरी नवरात्रोत्सवानिमित्त देवीची १०८ प्रकारच्या विविध पालेभाज्यांमध्ये आकर्षकरीत्या महेश गुरव, शीतल गुरव, संतोष गुरव व मंदार माळी यांनी पूजा बांधली.