इस्लामपूरच्या नंदूची एक्झिट अनेकांना चटका लावणारी

लोकमत न्यूज नेटवर्क

इस्लामपूर : येथील बुरूड गल्ली परिसरातील नंदू ऊर्फ नंदकुमार शिवाजी सूर्यवंशी (वय ४०) याचे हृदयविकाराने निधन झाले. शहरामध्ये तो नंदू या नावाने परिचित होता. पाच फूट उंची, धिप्पाड शरीरयष्टी, रापलेला काळा गोल चेहरा, त्यावर उठून दिसणारी पांढरी दाढी आणि डोक्यावरचे पांढरे केस तसेच विजार आणि शर्ट परिधान करून शहराच्या काेनाकोपऱ्यात मुक्त संचार असणाऱ्या नंदूची एक्झिट शहरवासीयांच्या मनाला चटका लावून गेली.

नंदूने शाळेचे तोंड बघितले नसले तरी त्याच्याकडे समाजात वावरताना लागणारे व्यावहारिक शहाणपण मात्र मोठे होते. कधीही कोणाशी वेडेवाकडे न बोलता नेहमी आर्जवाची भाषा आणि त्याची डोळ्यांतील ममता कित्येकांच्या मनात घर करून राहिली आहे. शहरात सगळीकडेच त्याचा वावर असल्याने कुठे गर्दी दिसेल त्या गर्दीत तो हरवून जायचा. मग कधी टाळमृदंगाच्या निनादात तल्लीन व्हायचा; तर कधी डोल्यांसमोर ढोल-ताशा वाजवत बेफाम व्हायचा. गणेशोत्सव, नवरात्राैत्सवात ध्वजधारी असायचा.

दिवसभराच्या भ्रमंतीत नंदूला खाण्या-पिण्याचे अथवा चहा-नाष्ट्याचे कधीच कमी पडले नाही. आपलाच नंदू या हक्काने सर्वजण त्याला खाऊ-पिऊ घालत. कधी-कधी तो पैसेही मागायचा. मात्र कुणी न दिल्यास रागही मानत नव्हता. नंदू हा शहराच्या राजकीय परिभाषेचा केंद्रबिंदू ठरला होता. तसेच वाढदिवसाच्या झगमगाटावर उपरोधिकपणे पांघरूण घालणारा आयकॉनही ठरला होता. पंधरा वर्षांपूर्वी शहरामध्ये वाढदिवसांचे वॉर उफाळून आले होते. बॅनरच्या गर्दीने संपूर्ण शहराचे विद्रूपीकरण झाले होते. या सगळ्याला पायबंद घालण्यासाठी वाळव्याच्या विजयकुमार पाटील यांनी थेट नंदूचाच वाढदिवस साजरा करीत त्याचे मोठे बॅनर तहसील कार्यालयाजवळ लावले होते. यामुळे शहरातील अनेकांनी आपल्याला नंदू म्हणू नये, या भीतीने आपल्या वाढदिवसाला आणि बॅनरबाजीला पायबंद घालून घेतला होता. नंदू अविवाहित होता. त्याच्या पश्चात भाऊ, भावजय, पुतणे असा परिवार आहे.