महापालिका संघाचा जि. प. संघावर विजय

लोकमत न्यूज नेटवर्क

सांगली : महापालिकेच्या २३ व्या वर्धापन दिनानिमित्त सोमवारी महापालिका विरुद्ध जिल्हा परिषद कर्मचारी संघात क्रिकेट सामना झाला. या सामन्यात महापालिका संघाने जि. प. संघाचा ७ गडी राखून पराभव केला.

सांगलीच्या छत्रपती शिवाजी महाराज क्रीडांगणावर या क्रिकेट सामन्याचे आयोजन केले होते. महापालिका संघाचे कर्णधार आयुक्त नितीन कापडणीस यांनी नाणेफेक जिंकून प्रथम गोलंदाजी घेतली. जिल्हा परिषद संघाने १५ षटकात ८ गडी गमावून ८५ धावा केल्या. जिल्हा परिषद संघात सिकंदर शेख, प्रवीण देसाई यांनी चमकदार कामगिरी केली. आयुक्त कापडणीस यांनी तीन षटकात दोन बळी घेतले. तसेच आजम पटेल व डाॅ. रवींद्र ताटे यांनी उत्कृष्ट गोलंदाजी केली.

प्रत्युत्तरादाखल खेळताना महापालिका संघाची सुरुवात संथगतीने झाली. अमित वायदंडे, रवींद्र ताटे यांनी फटकेबाजी करीत महापालिका संघाला विजयापर्यंत पोहोचविले.या सामन्यात महापालिकेचे भानुदास मोरे, वैभव वाघमारे, नकुल जकाते यांनी उत्कृष्ट क्षेत्ररक्षण केले, तर उपायुक्त राहुल रोकडे यांनी घेतलेला झेल लक्षवेधी ठरला. महापालिका संघ विजयी झाल्यानंतर मनपा आयुक्त नितीन कापडणीस यांनी सर्व विजेत्या खेळाडूंचे अभिनंदन केले.

दुसरा सामना पोलीस आणि महसूल विभागात झाला. सामन्यांचे समालोचन नगरसचिव चंद्रकांत आडके, किशोर गोंधळेकर, काका हलवाई यांनी केले. सामने यशस्वी करण्यासाठी क्रीडाधिकारी महेश पाटील, शहर अभियंता परमेश्वर हलकुडे यांनीही विशेष परिश्रम घेतले.

फोटो ओळी :- महापालिका ‌वर्धापन दिनानिमित्त महापालिका विरुद्ध जि. प. कर्मचारी संघात क्रिकेटचा सामना झाला. या सामन्यातील विजेत्या संघासोबत आयुक्त नितीन कापडणीस, उपायुक्त राहुल रोकडे, उपअधीक्षक अशोक वीरकर, वैभव वाघमारे, महेश पाटील आदी दिसत आहेत.