मंत्र्याची बैठक ऑफलाईन,मग महासभा ऑनलाईन का?

सांगली : महापालिकेच्या सभागृहात नगरविकास मंत्री एकनाथ शिंदे यांच्या उपस्थितीत बैठक होते. मग पालिकेची सर्वसाधारण सभा ऑनलाईन का? असा सवाल सत्ताधारी भाजपसह विरोधी नगरसेवकांतून विचारला जात आहे. पुन्हा एकदा ऑनलाईन सभेवरून प्रशासन विरुद्ध नगरसेवक असा कलगी तुरा रंगण्याची चिन्हे आहेत.

महापालिकेची महासभा २० जानेवारीला होत आहे. यावेळीही नगरसचिव कार्यालयाने ऑनलाईन सभा घेतली आहे. गत डिसेंबर महिन्यातही ऑनलाईन सभेवरून बराच गदारोळ झाला होता. महापौरांनी ही सभा तहकुब करावी लागली होती. त्यानंतर नगरविकास मंत्रालयाकडून मार्गदर्शन मागविण्यात आले. नगरविकास मंत्रालयाने स्थायीसह विषय समितीच्या बैठका ऑफलाईन घेण्यास मंजुरी दिली, पण महासभेचा उल्लेख जाणीवपूर्वक टाळला. त्यामुळे तहकूब सभा ऑनलाईन घेण्याची वेळ आली होती.

आता पुन्हा ऑनलाईन सभेवरून कलगी तुरा सुरू झाला आहे. भाजपचे सहयोगी सदस्य नगरसेवक गजानन मगदूम यांनी ऑनलाईन सभेला विरोध केला आहे. गतआठवड्यात नगरविकास खात्याचेच मंत्री एकनाथ शिंदे यांच्या उपस्थितीत महापालिका सभागृहात आढावा बैठक झाली. या बैठकीला ३०० हून अधिकजण उपस्थितीत होते. नगरविकास मंत्र्यांची बैठक ऑफलाईन होत असेल तर महासभा का नाही? असा सवाल त्यांनी केला आहे. विरोधी पक्षनेते उत्तम साखळकर यांनीही ऑनलाईन सभा न घेता ऑफलाईनच घ्यावी, अशी भूमिका घेतली आहे. पण नगरसचिव कार्यालयाने नियमावर बोट ठेवत ऑनलाईनच सभा होईल, असे स्पष्ट केल्याने प्रशासन विरूद्ध नगरसेवक असा संघर्ष वाढणार आहे.