महामार्गाची भूसंपादन प्रक्रिया पारदर्शक करा

खानापूर पूर्व भागातील महामार्ग बाधित शेतकऱ्यांनी महामार्गाच्या संयुक्त मोजणीबाबत तक्रार करून मोजणी रोखून धरली होती. त्यामुळे प्रांताधिकारी भोर यांनी सोमवारी दुपारी विटा येथे महामार्ग बाधित शेतकरी, महामार्ग अधिकारी व भूमी अभिलेख अधिकाऱ्यांची बैठक घेतली. या बैठकीत शेतकऱ्यांनी चुकीच्या पध्दतीने होत असलेल्या भूसंपादन प्रक्रियेबाबत नाराजी व्यक्त केली.

यावेळी अखिल भारतीय किसान सभेचे जिल्हाध्यक्ष उमेश देशमुख, जिल्हा संघटक गोपीनाथ सूर्यवंशी यांच्यासह शेतकऱ्यांनी भूसंपादन करताना शेतकऱ्यांना विश्वासात घ्यावे, गटाच्या रस्त्यालगतच्या हद्दी शेतकऱ्यांना दाखवाव्यात, मोजणी गटाच्या जुन्या अस्तित्वात असलेल्या सर्व्हे नंबरच्या खुणा लक्षात घेऊन मोजणी करावी, यापूर्वी रस्त्याच्या कामात झालेल्या स्थावर मालमत्ता, फळझाडे, पाइपलाइन, कूपनलिका यांची नोंद घेऊन शेतकऱ्यांना मोबदला द्यावा तसेच मोजणीबाबत होणाऱ्या त्रुटीबाबत भूमी अभिलेख यांच्यामार्फत खुलासा करावा अशा विविध मागण्या केल्या.

यावेळी राष्ट्रीय महामार्ग प्राधिकरणाचे उपअभियंता तुषार शिरगुप्पे यांनी आतापर्यंत महामार्गाच्या झालेल्या कामात स्थावर मालमत्ता, फळझाडे नुकसानीबाबत येत्या सोमवारपासून प्रत्येक गावात जाऊन सविस्तर माहिती घेऊन शेतकऱ्यांना दिलासा देऊ, अशी ग्वाही दिली. तर तालुका भूमी अभिलेख अधिकारी रोहिणी सागरे यांनी संयुक्त मोजणीत काही त्रुटी असतील तर शेतकऱ्यांनी पुराव्यानिशी सादर कराव्यात. त्या तातडीने दुरूस्त केल्या जातील, असे सांगितले.

या बैठकीस सचिन जाधव, दाजी पवार, महानंद हसबे, अशोक हसबे, सुनील हसबे, दौलत भगत, जयराम जाधव, भरत पाटील यांच्यासह अखिल भारतीय किसान सभेचे पदाधिकारी व शेतकरी उपस्थित होते.

चौकट

आजपासून संयुक्त मोजणी सुरू...

प्रांताधिकारी संतोष भोर यांनी शेतकऱ्यांना पहिल्यांदा मोजणी प्रक्रिया होऊ द्या, त्यानंतर पुढील प्रक्रिया करू, असे सांगितल्यानंतर शेतकऱ्यांनी त्या प्रस्तावाला मान्यता दिली. त्यामुळे महामार्गाची संयुक्त मोजणी प्रक्रिया मंगळवारपासून पुन्हा सुरू होणार आहे. मात्र, तोपर्यंत महामार्गाचे उर्वरित काम बंद ठेवण्याचा निर्णय या बैठकीत घेण्यात आला.

फोटो : १५०२२०२१-विटा-हायवे

ओळ : विटा प्रांताधिकारी कार्यालयात सोमवारी महामार्गबाधित शेतकरी व महामार्ग प्राधिकरण अधिकाऱ्यांची प्रांताधिकारी संतोष भोर यांच्यासमवेत बैठक झाली.