ॲपेक्स रुग्णालयाला नियमानुसारच परवाना

सांगली : ॲपेक्सला कोविड रुग्णालयाचा परवाना नियमानुसारच देण्यात आला आहे. २२ डाॅक्टरांसह ५६ कर्मचाऱ्यांचा स्टाफ असल्याची माहिती रुग्णालयाने दिली होती, तसेच जिल्हा प्रशासनाकडून नियुक्त परीक्षण समितीनेही या रुग्णालयाची वेळोवेळी तपासणी केली होती. महापालिकेने एकाच अर्जावर परवानगी दिलेली नाही. बॉम्बे नर्सिंग ॲक्टअंतर्गत सादर केलेल्या कागदपत्रांच्या आधारेच या रुग्णालयाला डेडिकेटेड कोविड रुग्णालयाची मान्यता दिल्याचा दावा महापालिका प्रशासनाच्या वतीने करण्यात आला. उलट डाॅ.महेश जाधव याने नियमांचे उल्लंघन केल्याने महापालिकेनेच त्याच्याविरुद्ध पोलिसांत तक्रार दिल्याचेही प्रशासनाने सांगितले.

ॲपेक्स रुग्णालयाप्रकरणी महापालिकेचे वैद्यकीय आरोग्याधिकारी डाॅ.सुनील आंबोळे यांनी शुक्रवारी स्पष्टीकरण दिले. यात म्हटले आहे की, ऑगस्ट २०२० मध्ये कोरोना रुग्णांची संख्या वाढल्याने, डाॅ.शरद सावंत यांच्या आदित्य हाॅस्पिटल अधिगृहीत करण्यात आले, पण सावंत यांनी रुग्णालय डाॅ. महेश जाधव याला चालविण्यास दिले होते. या हाॅस्पिटलमध्ये ऑक्सिजन पाइपला गळती लागल्याने सांगली-मिरज रोडवरील ॲपेक्स रुग्णालयाला कोविडचा परवाना देण्यात आला. ॲपेक्सने तीन इंटेन्सिविस्ट, एक निवासी डाॅक्टर, २२ डॉक्टर्स व ३० पॅरामेडिकल स्टाफ असे ५६ कर्मचारी उपलब्ध असल्याची माहिती महापालिकेला दिली होती.

कोरोनाच्या दुसऱ्या लाटेत ३ एप्रिल रोजी डॉ.जाधव याने अर्ज केला. त्याला १४ एप्रिल रोजी मान्यता दिली. कोविड हॉस्पिटलमधील उपचार कार्यपद्धतीची तपासणी करण्यासाठी नियुक्त परीक्षण समितीनेही ॲपेक्सची पाहणी करून अहवाल जिल्हा परिषद कोविड नियंत्रण कक्षाला सादर केला आहे. १९, २७ एप्रिल व ३ मे रोजी समितीने पाहणी केली. रुग्णालयात उपचार कार्यपद्धतीचे पालन होत असून, चार व्हेंटिलेटर, दहा बायपॅप यंत्रे उपलब्ध असल्याचा अहवाल दिला आहे. महापालिकेने ॲपेक्सला एकाच अर्जावर परवानगी दिलेली नाही. बॉम्बे नर्सिंग ॲक्टअंतर्गत त्यांनी सादर केलेल्या कागदपत्रांच्या आधारेच परवाना दिला.

दरम्यान, या रुग्णालयाबाबत अनेक तक्रारी आल्या. त्यानंतर, आयुक्त नितीन कापडणीस यांनी प्रत्यक्ष पाहणी केली. ३ मे रोजी रुग्णालयाला परवाना रद्द करण्याबाबत नोटीस बजाविण्यात आली. त्यानंतर, ७ मे रोजी रुग्णालयाचा परवाना रद्द केला. रुग्णांची बिले लेखापरीक्षण पथकास उपलब्ध करून दिली नसल्याने जिल्हाधिकारी व आयुक्तांच्या आदेशाने १८ मे रोजी गुन्हा दाखल केला, असेही डाॅ.आंबोळे यांनी खुलाशात म्हटले आहे.

चौकट

रुग्णालयात अनेक त्रुटी

ॲपेक्सला २ मे रोजी भेट दिली असता, अनेक त्रुटी आढळून आल्या. यात जैविक कचऱ्याची विल्हेवाट लावली गेली नव्हती. कोविड रुग्णांच्या उपचाराकरिता आवश्यक प्रशिक्षित वैद्यकीय अधिकारी व नर्सिंग स्टाफ आढळून आला नाही. आवश्यक व्हेंटिलेटर व इतर साधनसामुग्रीही पुरेशा नव्हत्या. तपासणी पथकासही हॉस्पिटलमध्ये प्रवेश दिला नाही. बाॅम्बे नर्सिंग ॲक्टनुसार दिलेल्या मुदतीत नोंदणी परवाना घेतलेला नाही. त्यामुळे डेडिकेटेड कोविड हाॅस्पिटल परवाना रद्द केल्याचे डाॅ.आंबोळे यांनी सांगितले.