चिखलीत चिमुकल्यांनी गिरवले मोबाईलवर धडे

शिराळा : चिखली (ता. शिराळा) येथील जिल्हा परिषदेच्या शाळेतील इयत्ता पहिलीमधील चिमुकल्यांनी मोबाईलद्वारे शिक्षणाचा श्रीगणेशा केला. काळानुरूप बदलत्या शिक्षणासाठी नवी पिढी सज्ज असल्याचे या उपक्रमाने सिद्ध झाले आहे.

सलग दुसऱ्या वर्षी शाळेची ऑनलाईन घंटा झाली. पहिलीच्या वर्गातील प्रवेशही ऑनलाईन झाले. अशावेळी पहिल्या इयत्तेतील मुले ऑनलाईन वर्गास कसा प्रतिसाद देतात याबाबत कुतूहल होते. परंतु चिखली शाळेच्या पहिलीतील मुलांनी ऑनलाईन वर्गास नव्वद टक्के उपस्थित राहून मोबाईलवर शिक्षण सुरू केले. यातून बदलत्या शिक्षण पद्धतीस विद्यार्थी सज्ज असल्याचे स्पष्ट झाले.

या ऑनलाईन वर्गास केंद्रप्रमुख दऱ्याप्पा साळी यांनी शुभेच्छा दिल्या. ते म्हणाले की ऑनलाईन शिक्षणाकडे सकारात्मक दृष्टिकोनातून पहावे. शिक्षण प्रक्रिया थांबू न देणाऱ्या ऑनलाईन शिक्षणाचे स्वागत करणे गरजेचे आहे.

यासाठी मुख्याध्यापिका स्वाती देसाई, शिक्षक राजेंद्र पाटील, सुभद्रा माने परिश्रम घेत आहेत. याबद्दल त्यांचे शाळा व्यवस्थापन समिती व ग्रामस्थांकडून कौतुक होत आहे.