खरसुंडी देवस्थान ‘अ’ वर्गसाठी निर्णय व्हावा

लोकमत न्यूज नेटवर्क

खरसुंडी : खरसुंडी (ता. आटपाडी) येथील श्री सिद्धनाथ देवस्थानच्या विकासाकडे लोकप्रतिनिधींचे दुर्लक्ष होत आहे. यामुळे दरवर्षी येथे येणाऱ्या लाखो भाविकांना गैरसोयींचा सामना करावा लागत आहे. याचा विचार करुन हे देवस्थान ‘अ’ वर्गात समाविष्ट करुन येथील विकासासाठी पावले उचलावीत, अशी मागणी स्थानिकांमधून होत आहे.

आटपाडी तालुक्यात गुहागर - विजापूर महामार्गावरील भिवघाटपासून काही अंतरावर तीर्थक्षेत्र खरसुंडी सिद्धनाथ देवस्थान आहे. हे हेमाडपंथी मंदिर असून, महाराष्ट्रभर प्रसिद्ध आहे. सांगली जिल्ह्यातील बहुसंख्य आमदार व खासदारांसह राज्यातील लाखो भाविकांचे हे कुलदैवत आहे. वर्षभरात दोन मोठ्या यात्रांनिमित्त खरसुंडीत दहा लाखांवर भाविकांची वर्दळ असते. परंतु, भाविकांसाठी याठिकाणी पुरेशा नागरी सुविधा उपलब्ध नाहीत. त्यामुळे देवदर्शनासाठी येणाऱ्या भाविकांना नेहमीच अनेक अडचणींना समोरे जावे लागते.

याठिकाणी सुसज्ज भक्तनिवास, वाहतूक व्यवस्था, स्वच्छ व पुरेसे पिण्याचे पाणी, सुलभ शौचालय आणि अन्य नागरी सुविधा उपलब्ध करणे गरजेचे आहे. मात्र, राजकीय इच्छाशक्तीअभावी हे देवस्थान विकासापासून वंचित आहे.

चौकट

जिल्ह्यातील मंत्री, खासदार व आमदारांनी खरसुंडी देवस्थानच्या सर्वांगिण विकासासाठी या ठिकाणाचा ‘अ’ वर्गात समावेश करून हे देवस्थान इतर देवस्थानांप्रमाणे नावारूपाला आणावे. याठिकाणी येणाऱ्या लाखो भाविकांसाठी सुविधा उपलब्ध कराव्यात. खरसुंडी देवस्थानची पश्चिम महाराष्ट देवस्थान समितीमध्ये नोंद करून ‘अ’ वर्गात समावेश व्हावा, अशी आमची मागणी आहे. परंतु, याकडे दर्लक्ष होत आहे.

- लता पुजारी, सरपंच, खरसुंडी