खानापूर शहर स्वच्छतेत अव्वल येणार

खानापूर : खानापूर शहर ‘स्वच्छ सर्वेक्षण’मध्ये पुन्हा एकदा अव्वल स्थानावर यावे, यासाठी या अभियानात नागरिकांनी, महिलांनी सक्रिय सहभाग घ्यावा, असे आवाहन नगराध्यक्ष तुषार मंडले यांनी प्रभाग मार्गदर्शन शिबिरात केले. खानापूर नगर पंचायतीने ‘स्वच्छ सर्वेक्षण २०२१’ अंतर्गत संपूर्ण शहरात मोठ्या प्रमाणात जनजागृती सुरू केली आहे. खानापूर शहरातील सर्व प्रभागांमध्ये विविध उपक्रम राबवून नागरिकांमध्ये स्वच्छतेबाबत जागृती करण्यात येत आहे.

ओला व सुका कचरा वर्गीकरण, परिसर स्वच्छता, घरगुती कचऱ्यापासून सेंद्रिय खतनिर्मिती तसेच या पार्श्वभूमीवर घ्यावयाची काळजी याबाबत मार्गदर्शनपर कार्यशाळा, कोपरा सभा असे विविध उपक्रम प्रभावीपणे राबविले जात आहेत. यासाठी नगर पंचायतीकडून दररोज कृती कार्यक्रम करण्यात येत आहेत.

नगर पंचायतीच्या आईसी विभागाने प्रभाग क्रमांक तीन व पाचमध्ये शिबिर घेऊन स्वच्छ सर्वेक्षणाबाबत सविस्तर माहिती दिली. यावेळी महिलांनी उत्स्फूर्त सहभाग दर्शवत शहर स्वच्छतेचा निर्धार केला. यावेळी गटनेत्या मंगल मंडले यांनी प्रभागात घरोघरी जाऊन स्वच्छतेबद्दल जनजागृती केली. नगरसेविका डॉ. वैशाली हजारे, नूतन टिंगरे, भारती माने, स्वप्नील मंडले यांनीही मार्गदर्शन केले. यावेळी नगरसेविका स्वाती टिंगरे, रेखा कदम, सुनीता भगत, रायसिंग मंडले, राखी माने, दिव्यानी हराळे, प्रमोद भोसले उपस्थित होते.